Saumu 51 - Ritonõpo Omiry: A Bíblia Sagrada na língua Aparai do Brasil

Tyyrypyry korokapotopõpyry

Tawi nymerohpyry sero.

¹ Ritonõpo, yna pyno exikehpyra oexiryke ajohpãme sã juãnohpyra exiko. Yna pyno oexiryke, iirypyryme jehtopõpyry ikorokako emero.

² Kukurikako popyra jexiryke, iirypyryme jehtoh ikurikako kure jehtohme ropa.

³ Zae pyra jehtopõpyry enetupuhnõko ase, yyrypyry mã kokoro rokẽ jẽpataka mana.

⁴ Yyrypyry mã oryhmaneme rokẽ mana, popyra ehtoh yriase oneneryme, ise pyra oehtoh ipunaka moro tyrise ya. Zae mase japiakaryhtao oya, juãnopyryhtao oya zae rokẽ mase morohne rĩko.

⁵ Ajohpe pyra, popyra ywy jenurutopõpyry poe ro; jenurutopõpyry poe ro iirypyryme exiketyme ase.

⁶ Zae jehtoh se mase ukurohtao ajohpe pyra jehtohme. Tuaro kyriko ukurohtao.

⁷ Yyrypyry touko ukurohtae kure jehtohme; kukurikako upo ikurikasenã sã jehtohme, mauru karimutumã motye jehtohme.

⁸ Sekese kyriko ropa tãkye exiketõ omiry etatohme ropa, oseahmaketõ omiry etatohme roropa, tytũtũmase jahtao ro oya tytohtohkase jahtao roropa, tãkye exĩko ropa ase.

⁹ Yyrypyry onenepyra exiko, popyra jehtopõpyry ikorokako ropa, emero porehme.

¹⁰ Ritonõpo, kure rokẽ josenetupuhtoh tyriko ukurohtao, Ouzenu ekaroko ya tyrisenã sã jehtohme ropa.

¹¹ Jenyohpyra exiko owinoino, Ouzenu kurã onupuxihkara exiko roropa ywinoino.

¹² Tãkye kyriko ropa typynanohse jexiryke oya, õmiry omipona se jehtoh tyriko ropa ukurohtao.

¹³ Moromeĩpo õmiry omipona pyra exiketõ amorepãko ase onyripohpyry poko, mame eramãko ropa mã toto oya.

¹⁴ Ritonõpo, ypynanohneme mase, kuewomako orihpyra jehtohme, mame tãkye rokẽ yna pynanohneme oehtoh ekãtõko ase!

¹⁵ Ritonõpo, wakorehmako õmiry poko jotururu poko, mame oeahmãko ase!

¹⁶ Okyno tõ etapary ya se pyra mase ynekaroryme oya; okyno zahkary se pyra roropa mase ynekaroryme oya.

¹⁷ Ritonõpo, ynekaroryme juzenu ekarõko ase oya osanume jahtao ro; “Ose pyra ase,” kara mase ya ime pyra jahtao ukurohtao, yyrypyry rumekary se roropa jahtao.

¹⁸ Ritonõpo, kure oexiryke Jerusarẽ põkõ akorehmako, ipatarykõ apururu tõ tyriko ropa!

¹⁹ Morarame opoetory tõ nekarory azamaro exĩko, zae okyno tõ zahkasẽ tytororo azamaro exĩko mana. Pui mũkuru tõ roropa zahkãko mã toto okyryry apoto apõ po.