Saumu 50 - Ritonõpo Omiry: A Bíblia Sagrada na língua Aparai do Brasil

Ritonõpo eahmary poko isene exiryke

Asape nymerohpyry.

¹ Ritonõpo, Jamihmehxo Exikety, Kuesẽkomo, oturũko mana; sero nono põkõ kohmãko xixi tũtatoh wino aomõtoh pona.

² Saereh ãko moroto Ritonõpo mana Jerusarẽ po, pata kurã potu ipunaka.

³ Kuesẽkõ oehnõko mana, mynyhme pyra eporehkãko mana; apoto nyahkary sã esemazupurume oehnõko. Zomye tyryrykane itamurume exĩko.

⁴ Kapuaõkõ kohmãko mana nono põkõ roropa eneneme toto ehtohme, typoetory tõ apiakary tyya enetohme.

⁵ Ynara ãko mana: “Jomiry omipona exiketõ enehpoko ya, tõmihpyrykõ etahpõkomo ya, mame moro enetupuhtohme tokykõ tyahkase eya xine tynekaroryme ya.”

⁶ Kapuaõkõ emero zae Ritonõpo ehtoh ekarõko mã toto, ynororo apiakaneme exĩko mana.

⁷ Ritonõpo ynara ãko: “Etatoko pahne ypoetory tomo, ourutorỹko ase; ohxirotorỹko ase, Izyraeu tomo. Ywy ase Ritonõpo Oesẽkomo.

⁸ Ohxiropyra xine ase onekarotyãkõ poko, okyno tomo, apoto apõ po onyahkatyãkomo, mokarohne onenehkehpyra matose ya.

⁹ Yrome otyme kure ya, pui orutua kõ oeky tõ wino? Mokaro apoiry se pyra ase, poti tõ se pyra ase roropa oeky tõ wino.

¹⁰ Onokyro tõ emero itu htaõ komo jekyme mã toto, pui tõ roropa miu motye ypy tõ po exiketõ jekyme mã toto.

¹¹ Torõ tõ jekyme mã toto, emero ypy tõ po exiketomo, onokyro tõ roropa ona po exiketõ jekyme mã toto.

¹² Omise jahtao tonahsẽ onekaropopyra jexiry oya xine, sero nono ykyryryme exiryke emero zao aexityã maro.

¹³ Johme pui orutua kõ pũ õnõko ha? Poti tõ munuru ẽnõko ha?

¹⁴ Ah, ‘Kure mase,’ katoh, onekarorykõme nexĩ ya. Õmihpyrykõ omipona oehtohkõ roropa: ‘Ynara ekarõko ase oya,’ karyhtao ya, moro ekaroko onekarorykõ kurãme Ritonõpo Imehxo Exikety a.

¹⁵ Kykohmako popyra ehtoh toehse ahtao, opynanohnõko ase, mame jeahmãko mase.”

¹⁶ Yrome popyra ehtoh poko exiketomo a ynara ãko Ritonõpo mana: “Oty katoh ynyripohpyry ekarõko matou? Oty katoh ynetapohpyry poko oturũko roropa matou?

¹⁷ Zae pyra oehtohkõ kurãkapory se pyra matose ya, ynyripohpyry oya xine rumekãko roropa matose.

¹⁸ Emero rokẽ omato tõ eneryhtao oya xine osepeme exĩko matose toto maro, imehnõ nohpo poko exiketõ maro imehnõ orutua poko exiketõ maro osepeme exĩko matose.

¹⁹ Ihximyra matose popyra õmiarykõ poko, tupime pyra oya ajohpe õtururu mana.

²⁰ Oekyrykõ hxirokehpyra matose, ajohpe ehtoh ke toto onykerekeremakehpyra matose.

²¹ Morohne tyrise oya xine, mame mynyhme rokẽ exiase; naeroro asã xine kuekaroase repe. Yrome seromaroro oupokatorỹko ase; zae pyra oehtohkõ enepõko ase oya xine.

²² Etatoko pahne, jenetupuhpyra exiketomo, jomiry onetara awahtao xine oenahkatorỹko ase. Mame opynanohnekõ pyra exĩko mana.

²³ ‘Kure mase,’ kary ya, onekaroryme mana, jeahmãko mase, mame opynanohtorỹko ase, jomipona awahtao xine emero porehme.”