Saumu 5 - Ritonõpo Omiry: A Bíblia Sagrada na língua Aparai do Brasil

Osewomapotoh Ritonõpo a

Sero saumu tymerose Tawi a.

¹ Ritonõpo, jotururu etako josenetupuhtoh roropa!

² Tuisa konõto Jesemy, Ritonõpo, otato exiko, kuakorehmako, ãko ase; oya oturũko ase, yna Esemy!

³ Pakeimo ẽmepyryhtao jomiry etãko mase; xixi tũtapitoryhtao, oturũko ase oya, mame jezuhtoh eraximãko ase oya.

⁴ Omoro mase Ritonõpo, popyra ehtoh azamaro pyra mana; Popyra ehtoh poko exiketõ onenehpopyra mase oẽpataka.

⁵ Epyrypaketõ se pyra mase ipunaka. Popyra exiketõ zehno mase emero porehme.

⁶ Ajohpe exiketõ enahkapõko mase, imehnõ ryhmananõ se pyra mase ipunaka, imehnõ enekunohnanõ roropa.

⁷ Yrome yna pyno oexiryke yronymyryme omõnõko ase azarã pona Atapyĩ taka, jesekumuru po porohnõko ase oẽpataka oeahmãko ase Atapyĩ Kurã tao.

⁸ Ritonõpo, jepetõkara tuhke mã toto! Kuakorehmako zae jehtohme, õmiry omipona jehtohme. Jesemary zae ehtoh poko enepoko ya epona jytotohme.

⁹ Jepetõkara omiry zae pyra mana ipunaka. Imehnõ enahkary poko rokẽ osenetupuhnõko mã toto. Aomirykõ kure sã mã repe, imepỹ pyrypãko. Yrome enekunohnõko mã toto aorihmapotohme.

¹⁰ Ajohpãme sã mokaro apiakako, toto wãnohtohme, Ritonõpo! Osenetupuhnõko mã toto imehnõ ryhmary poko, naeroro tyripoko toto osenahkapotohme! Aropoko toto owinoino, tahxime õmiry omipona pyra toexirykõke, orumekary se roropa toexirykõke.

¹¹ Yrome amaro tõsewomary se exiketõ tãkye exĩko mã toto, tãtãkyemarykõme eremiãko mã toto, toto ewomãko oexiryke. Opyno exiketõ tãkye exĩko mã toto opokoino.

¹² Ritonõpo, yna Esemy, kure rokẽ mokaro rĩko mase, õmiry omipona exiketomo, kure oehtoh toto ewomãko mana osewomatoh samo.