Saumu 49 - Ritonõpo Omiry: A Bíblia Sagrada na língua Aparai do Brasil

Ekurehpyra orihketõme sytatose porehme

Kora tõ nymerohpyry.

¹ Ahno tomo, etatoko pahne! Otato ehtoko, sero nono põkomo porehme,

² tuisamehxo exiketomo te, imehnõ poetory tomo, tymõkomoke exiketomo te, tymõkomokãkara roropa,

³ Josenetupuhtoh enetupuhpõko mana; tuaro ehtoh ekarõko ase.

⁴ Atamorepãko ase omi tuaro ehtoh poko, ipoko amorepãko ase, ykyryry rue ynetoryke.

⁵ Enaromyra ase popyra ehtoh toehse ahtao, tomyehmase jahtao yzehnotokomo a.

⁶ Popyra exiketõ orẽpyra osekarõko mã toto tytinerũkõ pokoino, itamurume tytineruke toexirykõ poko epyrypãko mã toto.

⁷ Yrome onepehmasaromepyra sytatose orihpyra kuehtohkõme; Ritonõpo onepehmasaromepyra sytatose jũme isene kuehtohkõme,

⁸ isene ahno ehtoh typyne kuhse exiry mana. Tineru itamurume nae ahno ahtao ro ipune pyra exiry mana,

⁹ orihpyra mokyro ehtohme, jũme isene mokyro ehtohme.

¹⁰ Ynara enẽko sytatose: tuaro exiketõ ro orihnõko mã toto, tuaro pyra exiketõ morararo, putupyra exiketõ morararo. Tymõkomorykõ nomõko mã toto emero imehnõ mõkomoryme.

¹¹ Ekepyrykõ zonẽtoh tonõ itapyĩkõme exĩko mana jũme; moroto exikehpyra exĩko mã toto nono itamurume esemỹpyryme toto ahtao ro.

¹² Kymarokõ ahnome kuexirykõke, imehxo kuahtao xine ro, ekurehpyra orihnõko sytatose; onokyro tõ orikyry sã orihnõko sytatose.

¹³ Mokaro etyhpyry enetoko ke typoe xine rokẽ orẽpyra osekaroketomo; enetoko ke tymõkomorykõ poko epyrypaketomo,

¹⁴ kaneru sã orihnõko mã toto, aorihtohkõ toto esẽ sã toto arõko. Ẽmepyryhtao mokaro poremãkapõko zae exiketõ mã toto; ekepyrykõ motãko mana zonẽtopõpyry ao ameke toto tapyinỹpyrykõ winoino.

¹⁵ Yrome juzenu pynanohnõko Ritonõpo mana joorihtopõpyry wino, jarõko mana tymaro jehtohme.

¹⁶ Torẽtyke pyra ehtoko imehnõ tymõkomoke toehse ahtao, itamurumehxo imõkomory tomãse ahtao.

¹⁷ Tymõkomory anarosaromepyra mana toorihse ahtao; imõkomory ytopyra mana imaro zonẽtoh aka.

¹⁸ Tãkye exiketyme ahno ahtao ro isene toehtoh poko, kure turuse ahtao roropa inyrityã poko,

¹⁹ toorihse ahtao tytamuru tõ maro oximõnõko mana, moroto xinukutume ehtoh exikehpyra mana.

²⁰ Kymarokõ ahnome kuexirykõke, imehxo kuahtao xine ro, ekurehpyra sytatose; onokyro tõ orikyry sã orihnõko sytatose.