Saumu 48 - Ritonõpo Omiry: A Bíblia Sagrada na língua Aparai do Brasil

Jerusarẽ, Ritonõpo patary

Kora tõ nymerohpyry.

¹ Tuisamehxo Ritonõpo mana, eahmaryme seremiatone ipatary Xião po, esary ypy kurã po.

² Ritonõpo esary ypy kae mana, kure potu roropa; Tuisa konõto patary poko atãkyemãko sero nono põkõ mã toto porehme.

³ Tonepose Ritonõpo a tymaro exiketõ ewomãko mana, tapyi jamihmãkõ tao pata po.

⁴ Imehnõ tuisa tõ tõximõse tõsetapatohkõme, ypy Xião kararahtohme repe.

⁵ Yrome toeporehkase toto ahtao pata pona tõserehse toto; toepase toto enaromỹke toexirykõke.

⁶ Tonaroxitapãse toh nexiase, taosanumase toto, nohpo jetũ ehtoh samo enururuhtao,

⁷ wapu ao ytoketõ samo, wapu konõto ao tomase ahtao pohkane konõto a, tyryrykane jamihme exikety maro.

⁸ Ritonõpo nyrityã poko totase yna a, seromaroro ynanenease Kuesẽkõ nyrihpyry typatary ao, Ritonõpo Jamihmehxo Exikety. Jũme typatary ewomãko mana.

⁹ Ritonõpo, Atapyĩ tao osenetupuhkehpyra ynanase yna pyno oehtoh poko.

¹⁰ Ritonõpo, oeahmãko ahno tõ mana emero nono po, oesety waro onyrityã roropa imeimehnõ nonory po porehme. Zae rokẽ tuisame mase;

¹¹ atãkyematoko Jerusarẽ põkomo! Ritonõpo, zae rokẽ apiakãko mase! Naeroro atãkyematoko Juta patary tõ põkomo!

¹² Ritonõpo poetory tomo, ytoytotoko Jerusarẽ poro, tapyi tõ kaetokohxo exiketõ ikuhtoko tuhke exiry waro ehtohme!

¹³ Pata apuru tõ enetoko kure; soutatu tõ esary jamihmãkõ enetoko kure roropa. Morarame ynara ãko matose opoenomo a apakomotyamo a roropa:

¹⁴ Mose Ritonõpo jũme Kuesẽkõme mana. Zae kuarotorỹko mana jũme rahkene.