Saumu 47 - Ritonõpo Omiry: A Bíblia Sagrada na língua Aparai do Brasil

Ritonõpo, nono Esẽme porehme

Kora tõ eremiatopo.

¹ Tahtah kaxitoko atãkyemaryme, ahno tõ emero! Opore eremiatoko Ritonõpo eahmaryme!

² Kuesẽkõ imehxo mana, kure ehtoh se rokẽ mana kyya xine; Tuisa imehxo mana, sero nono Esẽme porehme.

³ Ritonõpo a imehnõ ahno typoremãkapose yna a; imeimehnõ nonory põkõ tuisaryme yna tyrise eya.

⁴ Sero nono tymenekase eya kuesarykõme ehtohme, sero nono poko tãkye toehse ipoetory tomo, mokaro pyno mã ynororo.

⁵ Onuhnõko Ritonõpo mana tapõ pona, tuisa konõto apõ pona. Morara ahtao tãkye exiketõ kohtãko, rue tõ etõko mã toto.

⁶ Eremiatoko, Ritonõpo eahmaryme; eremiatoko Kutuisarykõ eahmaryme!

⁷ Eremiatoh ke Ritonõpo eahmatoko! Tuisame mana sero nono Esẽme porehme.

⁸ Tapõ po typorohse Ritonõpo mana, tuisa konõto apõ kurã po; sero nono põkõ Esẽme mana porehme.

⁹ Sero nono põkõ tuisary tõ oximõnõko mã toto Ritonõpo poetory tõ maro, Aparão Esẽ poetory tõ maro. Sero nono põkõ jamitunuru emero motye tuisamehxo mana; imehnõ emero Esẽme Ritonõpo mana.