Saumu 46 - Ritonõpo Omiry: A Bíblia Sagrada na língua Aparai do Brasil

Ritonõpo kymaro xine mana

Kora tõ nymerohpyry.

¹ Kuewomanekõme Ritonõpo mana, kyjamitunurukõme roropa mana. Ameke pyra exiryke kuakorehmatorỹko mana popyra ehtoh toehse ahtao.

² Morara exiryke enaromyra exĩko sytatose, sero nono tykytyky karyhtao ro, ypy tõ epukaryhtao roropa zue aka, tuna konõto kuaka;

³ Oserehpyra sytatose pohkane konõto etaryhtao tuna konõto kuao, ypy tõ kywyh kywyh karyhtao roropa.

⁴ Tuna nae mana, ipokoino tãkye exĩko Ritonõpo patary põkõ mana, Ritonõpo Imehxo Exikety tapyĩ kurã taõkomo.

⁵ Moro pata po Ritonõpo mana, naeroro jũme enahpyra exĩko mana; ẽmepyryhtao typatary akorehmãko Ritonõpo mana.

⁶ Imehnõ nonory põkõ oserehnõko mã toto, mokaro kowenu tõ tyjamihkehkasẽme mã toto. Oturũko mã Ritonõpo konomeru samo, tuname sero nono exĩko mana.

⁷ Ritonõpo Jamihmehxo Exikety kymaro xine mana; Jako Esemy kuewomanekõme mana.

⁸ Osehtoko osenuhmatokose Kuesẽkõ nyrihpyry! Enetokose osenuruhkatoh tonõ tyrise eya sero nono po.

⁹ Osetapatoh konõto mynyhpãkãko mana sero nono po porehme; taky tõ tahkãko mana, warata tõ roropa, osewomatoh tonõ zahkãko mana.

¹⁰ “Osetapakehtoko,” ãko ynororo. “Zuaro ehtoko ypoko, ywy ase Ritonõpo. Sero nono põkõ tuisaryme ase. Sero nono esẽme ase, porehme.”

¹¹ Kuesẽkõ Jamihmehxo Exikety kymaro xine mana; Ritonõpo Jako Esemy kuewomanekõme mana.