Saumu 44 - Ritonõpo Omiry: A Bíblia Sagrada na língua Aparai do Brasil

Oturutoh Ritonõpo a osewomapotohme

Kora tõ nymerohpyry.

¹ Ritonõpo, moro poko totase yna a ynapanary ke, turuse yna, yna tamuru tomo a, onyrihpyry poko ajamitunuru ke pake ahtao, isene ro toto ahtao.

² Ajamitunuru ke imehnõ ahno maropoase opoetory tõ esaryme moroto ehtohme. Turuse yna imehnõ ahno wãnohtopõpyry poko oya. Moro tyrise oya kure rokẽ opoetory tõ ritohme, toto emãtohme.

³ Typyrekõ ke pyra moro nono typoremãkase opoetory tomo a; tyjamitunurukõke pyra topetõkara typoremãkase eya xine. Yrome ajamitunuru ke orẽpyra oexiryke typoremãkase toto eya xine, imaro xine oehtoh poko tutuarõtanohpose toto oya exiryke roropa. Moro eneryke tyya xine typyno xine oehtoh waro toh kynexine.

⁴ Ritonõpo, utuisaryme mase, Jesẽme roropa; orẽpyra opoetory tõ rineme mase.

⁵ Ajamitunuru ke yna zehnotokõ poremãkãko ynanase, yna maro oexiryke yna etapary se exiketõ enahkãko ynanase.

⁶ Ypyre pokoino pyra orẽpyra exĩko ase, taky maro, ytapemã maro; morohne pokoino pyra jepetõkara poremãkãko ywy.

⁷ Yrome omoro mase yna pynanohneme yna epetõkara wino, oya yna zehno exiketõ typoremãkase.

⁸ Oeahmary poko kohmãnõko ynanase; “Kure mase,” kakehpyra ynanase.

⁹ Yrome seromaroro turumekase ynanase oya, typoremãkapose yna zehnotokomo a, yna maro ytopyra mase yna ytoryhtao etonatoh taka.

¹⁰ Morara exiryke ynanepase yna epetõkara wino taropose yna exiryke oya, yna mõkomory tapoise eya xine tymõkomorykõme.

¹¹ Yna maro pyra oexiryke, yna etaetapase toto kaneru tõ samo, sapararahme yna taropose oya imehnõ nonory pona.

¹² Opoetory tõ tokamose oya, epehpyry pitiko poko, mõkomo typyne pyra aexihpyry samo.

¹³ Moro onyrihpyry yna poko enẽko mã ynakatonomory, yna eunohnõko mã toto, exianãko roropa mã toto yna poko.

¹⁴ Opoe yna poihtõko imeimehnõ nonory põkõ mana; imehnõ ahno ynahtomãko mã toto.

¹⁵ Yna onutuarimanohpokehpyra mã toto, ehxirõko ase yronymyryme,

¹⁶ ykerekeremary yzehnotokomo a etaryke ya, yyryhmary se exiketõ omiry etaryke roropa ya.

¹⁷ Moro sã toehse yna a emero, wenikehpyra yna ahtao ro opoko; anamonohpyra roropa yna ahtao, õmihpyry poko, onetapohpyry opoetory tomo a.

¹⁸ Eramara ynanexiase opoe, õmihpyry omipona ynanexiase, onyripohpyry omipona.

¹⁹ Yrome oya tomase yna, akurihmohpyry sã onokyro tõ rãnao, turumekase yna oya xinukuturu htao.

²⁰ Omoro, Ritonõpo, toahmakehse awahtao yna a, imepỹ neponãmary eahmatohme yna a,

²¹ moro poko yna ahtao zuaro oexiry, emero ahno osenetupuhtoh waro oexiryke, tokare pyra ahtao ro zuaro mase.

²² Yrome opokoino kokoro rokẽ yna etapãko mã toto. Yna rĩko mã toto kaneru samo etapatoh taka tarose ahtao osewomara.

²³ Ritonõpo, apakako! Oty katoh nyhnõko mah? Owõko! Yna onurumekara exiko, jũme.

²⁴ Oty katoh yna poe otonẽnõko mahno yna zunoto samo? Oty katoh yna rumekãko mah yna etuarimary htaho?

²⁵ Toepukase ynanase nono pona; typoremãse ynanase, tohpahse nono pona.

²⁶ Owõko yna akorehmatohme! Yna ipynanohko kure oehtoh pokoino, yna pyno oehtoh enahpỹme exiryke.