Saumu 41 - Ritonõpo Omiry: A Bíblia Sagrada na língua Aparai do Brasil

Oturutoh Ritonõpo a kure pyra ahtao

Sero saumu tymerose Tawi a.

¹ Tãkye mã mokaro tymõkomokãkara pyno exiketomo. Mokaro akorehmãko Ritonõpo mana popyra ehtoh toehse ahtao eya xine.

² Mokaro ewomãko Kuesẽkõ mana okynahxo isene toto ripõko mana. Tãkye toto ripõko mana tynekarohpyry po toto nonoryme. Toto onyryhmapopyra mana epetõkara a.

³ Toto jamihtanohpõko ropa Kuesẽkõ mana inyhtohkõ po kure pyra toto ahtao toto akorehmãko mana kure toto ehtohme ropa.

⁴ Ynara ase: “Ritonõpo Jesemy, iirypyryme toehse ywy oneneryme. Juãnohpyra exiko kukurãkako ropa.”

⁵ Jepetõkara omiãko xihpyryme ypoko mã toto. Joorikyry se mã toto wenikehtohme ypoko.

⁶ Jenese oehketõ ajohpe rokẽ mã toto; oturupõko mã toto kure pyra jehtoh poko, mame tõmirykõ ahpahnõko mã toto.

⁷ Yse pyra exiketõ putiputime oturũko mã toto oseya rokẽ ypoko: “Popyra exĩko mana itamurume,” ãko mã toto, osenetupuhnõko.

⁸ “Tyrohsẽ popỹ tapoise eya tynyhtoh poe owõpyra ropa mana, orihnõko mana,” ãko mã toto.

⁹ Jepe kurã roropa, zae exiketyme ekaroase, ymaro otuhkety, mokyro jewokaneme toehse.

¹⁰ Ritonõpo Jesemy, juãnohpyra exiko, kukurãkako ropa, mame yzehnotokõ emetakamãko ase!

¹¹ Yporemãkara exĩko mã toto, mame azamaro jehtoh waro exĩko ase.

¹² Jakorehmãko mase zae ehtoh poko jexiryke. Amaro jyrĩko mase jũme.

¹³ Ritonõpo eahmatoko, Izyraeu tõ Esemy! Eahmatoko seromaroro, jũme roropa! Enara rokene!