Saumu 40 - Ritonõpo Omiry: A Bíblia Sagrada na língua Aparai do Brasil

Eremiatoh Ritonõpo eahmaryme

Sero saumu tymerose Tawi a.

¹ Eraximase, atarypopyra exiase Kuesẽkõ eraximary poko, jakorehmatoh eya eraximase. Mame ya toeramase ynororo yxitary etatohme, jomiry totase eya.

² Janymyase oramã xihpyry ae, ikurepato tahxikurẽ poe, purapuramã orihmatõ poe. Topu jamihmã pona jaroase, jewomatohme.

³ Jamorepase eremiatoh tyrisenã poko, eremiatohme Kuesẽkõ kurã eahmatoh poko. Moro eneryke tyya xine tuhkãkõ enetupuhnõko mana, Kuesẽkõ enetupuhnõko mã toto tosẽkõme.

⁴ Tãkye exiketõ mokaro Kuesẽkõ enetupuhnanomo, eramara roropa mã toto imehnõ neponãmarykõ pokona. Oximõpyra roropa mã toto mokaro maro imehnõ neponãmarykõ poko exiketõ maro.

⁵ Ritonõpo, yna Esemy, tuhke kurãkõ tyrise oya yna akorehmatohme. Apanõ pyra mana! Õsenetupuhtoh mã tuhke, kure yna ritohme. Emero õsenetupuhtoh kukuruhtao ya tuhke exiry waro jehtohme ekuhpỹme mana.

⁶ Okyno tõ etapary ynanekaroryme ise pyra mase, tiriiku tõkehko maro. Okyno tõ zatyry apoto apõ po onekaropopyra mase yna a yna rypyry korokatohme. Yrome ypanary totapuruhmakase oya, õmiry etatohme ya.

⁷ Naeroro kuezukuase: “Taro ase; Õmiry ya tymerose nase pape pokona, onyripotyamo.

⁸ Õmihpyry omipona sehxo ase, Ritonõpo Jesemy! Jamorepatopõpyry oya ukurohtao mana.”

⁹ Ritonõpo, opoetory tõ oximõmãkõ ẽpataka õmiry kurã ekaroase yna pynanopyry poko oya. Moro omi kurã onekarokehpyra ase, zuaro mase.

¹⁰ Õmiry kurã yna pynanopyry poko ononẽpyra exiase. Zae oehtoh poko yna akorehmatopõpyry poko roropa oturuase. Imoihmãkõ rãnao mynyhme pyra exiase amonohkara oehtoh poko opoetory tõ poko, toto pyno oehtoh poko, enara.

¹¹ Ritonõpo, zuaro ase ypyno exikehpyra mase. Ypyno oexiryke amonohkara roropa oexiryke jũme jewomãko mase.

Oturutoh Ritonõpo a takorehmapotohme

¹² Tomyehmase ywy yyryhmatoh ke tuhke. Ikuhpỹme mã toto. Yyrypyry tõ pokoino otupĩko ywy tonurẽkara samo. Jũsety motye jupuhpyry po yyrypyry tõ toehse tuhke, naeroro typoremãse ywy.

¹³ Ritonõpo Jesemy, kypynanohko! Kuakorehmako seromaroro!

¹⁴ Jetapary se exiketõ iporemãkapoko, tuaro pyra tyripoko toto. Tãkye exiketõ jetuarimary poko iramapoko ropa toto epatohme ropa aehxirotohkõme.

¹⁵ Ah ypoihtonanõ notupĩ toto; Xẽ! Xẽ! kananomo typoremãkase toexirykõke.

¹⁶ Ah tãkye nexĩ toto emero oehketõ oya, ah noseahmã toto. “Ritonõpo rokẽ mã imehxo Kuesẽkomo,” nykã toto mokaro tãkye exiketõ typynanopyrykõ poko.

¹⁷ Ywy ase jamihme pyra te, tytineruke pyra; Ritonõpo axĩ ke osehko ya! Ypynanohneme mase, Jesẽme mase. Axĩ ke kuakorehmako, Jesemy!