Saumu 4 - Ritonõpo Omiry: A Bíblia Sagrada na língua Aparai do Brasil

Atakorehmapotoh Ritonõpo a

Sero saumu tymerose Tawi a.

¹ Ritonõpo, Jewomane, kuezuhko jotururuhtao oya! Etuarimãko exiase, yrome kuakorehmase. Ypyno exiko seromaroro, jotururu oya etako!

² Orutua komo, oty katohme orẽpyra jehtopõpyry tyoromãko matou jyhxirotoh ke? Oty katoh popyra ehtoh se rokẽ matou? Oty katoh ajohpe ehtoh etãko roropa matou?

³ Wenikehpyra ehtoko: zae ehtoh poko exiketõ tymenekase Ritonõpo a typoetoryme toto ehtohme; jotururu etãko mana ikohmaryhtao ya.

⁴ Enaromỹke ehtoko, oorypyrykõ poko exikehtoko; mynyhme ehtoko onyhtohkõ po õsenetupuhtohkõ waro oehtohkõme.

⁵ Zae onekarorykõ ekarotoko Ritonõpo a, Oesẽkõme enetupuhtoko.

⁶ Imehnõ ynara ãko oya: Kure ehtoh ekaroko yna a itamurumehxo, Ritonõpo, nupunato yna eneko, yna pyno exiko!

⁷ Yrome opoko tãkye jehtoh, onekarohpyry ya mokaro tãkye ehtoh motye mana tykyrysã apoiry poko eya xine.

⁸ Ataxikãko ase torẽtyke pyra, kure rokẽ nyhnõko ase, omoro rokẽ Ritonõpo, jewomãko mase.