Saumu 37 - Ritonõpo Omiry: A Bíblia Sagrada na língua Aparai do Brasil

Iirypyrymãkõ etyhpyry, kurãkõ etyhpyry roropa

Sero saumu tymerose Tawi a.

¹ Torẽtyke pyra exiko popyra exiketõ poko. Zae pyra ehtoh poko exiketõ poko zumoxike pyra exiko.

² Onahpoty anoryry sã, okynã pyra osenepyra exĩko mã toto; orihnõko mã toto otyro orikyry sã xixi ao.

³ Ritonõpo enetupuhko Oesẽme, kure ehtoh poko exiko roropa; morara awahtao kure exĩko mase, imehnõ zuno pyra Ritonõpo nekarohpyry po.

⁴ Atãkyemako Kuesẽkõ poko! Mame openetatoh ekarõko oya mana.

⁵ Osekaroko Kuesẽkomo a. Oesẽme nymyry enetupuhko. Mame ãkorehmãko mana.

⁶ Ajohpe pyra oehtoh ẽmepyry sã tyripõko mana. Zae oehtoh ripõko mana saerehkatoh samo tãxiahtao exikety samo.

⁷ Imehnõ zumoxike pyra exiko, tineru itamurume apoiryhtao eya xine, oserẽtykyro pyra exiko imehnõ poko, typenetatohkõ xihpyry riryhtao roropa eya xine. Mynyhme rokẽ exiko Ritonõpo nyriry eraximaryme.

⁸ Zehno pyra exiko, zenonohpyra roropa. Imehnõ poko atakirimara roropa exiko, torẽtyke pyra exiko popyra oexiryino.

⁹ Ritonõpo Kuesẽkõ enetupuhnanõ mã kure rokẽ exĩko inekarohpyry po kuesarykõme. Yrome popyra exiketõ mã taroposẽme exĩko mã toto.

¹⁰ Okynã pyra popyra exiketõ mã osenepyra exĩko mana; toto zupiry se awahtao, toto zupĩko mase repe, yrome toto onenepyra exĩko mase.

¹¹ Tyamene se pyra exiketõ towomasẽme exĩko mã toto Ritonõpo nekarohpyry po, tãkye exĩko mã toto, kure rokẽ exĩko torẽtyke pyra roropa.

¹² Popyra exiketõ mã atamorepãko mã toto kurãkõ poremãkatohme tyya xine. Zehno sã toto enẽko mã toto.

¹³ Yrome pohnõ eneryke tyya, exianãko Kuesẽkõ mana, okynã pyra enahnõko mã toto. Moro waro Kuesẽkõ mana.

¹⁴ Popyra exiketõ typyrekõ apoĩko mã toto: tapema tomo, taky tõ maro, tymõkomokãkara etapatohme, etuarimaketõ maro, zae ehtoh poko exiketõ roropa etapatohme.

¹⁵ Yrome mokaro popyra exiketõ totapasẽme exĩko mã toto tytapemãkõ ke, itakykõ tytahkasẽme exĩko roropa mã kehko.

¹⁶ Kurehxo mõkomo pitiko, zae ehtoh poko exiketõ mõkomoryme ahtao; popyrahxo mõkomo itamurume, zae pyra exiketõ mõkomoryme ahtao.

¹⁷ Ynara exiryke mokaro zae pyra exiketõ jamitunuru enahnõko mana, yrome zae ehtoh poko exiketõ ewomãko Kuesẽkõ mana.

¹⁸ Tõmihpyry omipona exiketõ pynanohnõko Kuesẽkõ mana; jũme inekarohpyry esẽme exĩko mã toto.

¹⁹ Popyra ehtoh toehse ahtao, etuarimara exĩko mã toto. Inapyrykõ ipune mana emitapãtoh konõto toehse ahtao.

²⁰ Yrome popyra exiketõ orihnõko mã toto; Kuesẽkõ zehnotokõ osenepyra exĩko mã toto onahpoty ekuru sã jakanahmã po. Orexĩto sã osenepyra exĩko mã toto.

²¹ Popyra exiketõ tineru ekaropõko mã axĩtao rokẽ repe, yrome onepehmara ropa ekurehnõko mã toto. Mãpyra zae ehtoh poko exiketõ imehnõ pynanohnõko mã toto, tykyryrykõ ekarõko mã toto pitiko rokẽ pyra.

²² Kure rokẽ Ritonõpo nyrityã moroto exĩko mã toto inekarohpyry po toto esaryme. Yrome popyra tyripose aexityã enahkãko mana.

²³ Zae kuesemarykõ ae kuarotorỹko Kuesẽkõ mana, tyamaro exiketõ ewomãko mana.

²⁴ Aepukarykohtao jũme toto onemapopyra Esẽkõ mana, toto akorehmãko mana owõtohme ropa.

²⁵ Poetome exiase, seromaroro tamuhpõme toehse ywy, yrome yneneryme zae ehtoh poko exiketõ onurumekapitopyra Kuesẽkõ mana. Ipoenõ roropa: “Ise, ise,” kara toto tonahsẽ poko.

²⁶ Imehnõ pynanohnõko mana, tytineru ke imehnõ akorehmãko mana. Ipoenõkõ roropa Ritonõpo nekarohpyryme mã toto.

²⁷ Zae pyra ehtoh poe eramako, zae ehtoh poko oehtohme; mame opoenõ maro apakõ maro exikehpyra matose Ritonõpo nekarohpyry po.

²⁸ Zae ehtoh poko exiketõ Kuesẽkõ zamaro mã toto, typoetory ỹme exiketõ onurumekara mana, toto ewomãko mana. Yrome zae pyra ehtoh poko exiketõ pakomotyã enahketõme mã toto.

²⁹ Zae ehtoh poko exiketõ mã nono esẽme exĩko mã toto Ritonõpo nekarohpyry po. Jũme moroto exĩko mã toto.

³⁰ Tuaro exiketõme mã oturũko mã toto, zae ehtoh poko exikehpyra aomirykõ mana.

³¹ Ritonõpo omiry ikurohtao xine mana ikurãkahpyry samo. Aomiry omipona exikehpyra mana.

³² Zae ehtoh poko exiketõ enẽko popyra exiketõ mana. Toto etapary se mã toto.

³³ Yrome typoetory tõ kurã onurumekara Kuesẽkõ mana, zehno exiketõ emahpo ahtao; mame apiakane ẽpataka tarose toto ahtao toto anaorihmapopyra mana.

³⁴ Ritonõpo enetupuhko Oesẽme, aomiry omipona exiko. Nono esẽme orĩko mana moroto tynekarohpyry po, popyra aexityã enẽko mase tonahkase toto ahtao.

³⁵ Popyra exikety enease tuisame toehse ahtao; imehnõ ryhmãko kynexine, imehnõ motye tuisamehxo tõsekarose ynororo repe, apupari samo ypy Ripano tõ po.

³⁶ Yrome imeĩpo esary kuroko toytose jahtao onenepyra exiase; upiase repe, yrome mokyro onenesaromepyra exiase.

³⁷ Zae ehtoh poko exiketõ eneko, ajohpe pyra exiketõ roropa; atatapoipyra exiketõ typoenõke, typakõke roropa mã toto,

³⁸ yrome Ritonõpo omiry omipona pyra exiketõ osenahkãko mã toto, ipakomotyã osenepyra exĩko, tonahkase.

³⁹ Zae ehtoh poko exiketõ pynanohnõko Kuesẽkõ mana, toto ewomãko mana popyra ehtoh toehse ahtao.

⁴⁰ Toto akorehmãko mana, toto pynanohnõko roropa mana; tõsewomaporykõke roropa eya xine Ritonõpo a toto ewomãko mana zehnotokõ poe.