Saumu 35 - Ritonõpo Omiry: A Bíblia Sagrada na língua Aparai do Brasil

Kuakorehmako Ritonõpo, katopõpyry Tawi a

Tawi nymerohpyry.

¹ Ritonõpo Jesemy, atatapoiko yyryhmary se exiketõ maro, yporemãkary se exiketõ iporemãkapoko!

² Okyryry osewomatoh apoiko, oupõ kurimene risẽ maro, mame osehko jakorehmase.

³ Awaratã apoiko, kaparu roropa yyryhmananõ poremãkatohme. Õmiry etapoko ya ypynanopyry poko oya rahkene.

⁴ Ah mokaro jetapary se exiketõ typoremãkase nexĩ toto! Ah toehxirose nexĩ toto! Ah nepã toto otupĩko rokẽ rahkene, yyryhmary se aexityamo!

⁵ Ah tiriiku pihpyry sã nexĩ toto tarose tyryrykane a, tokahmase toto ahtao Ritonõpo nenyokyhpyry a!

⁶ Ah toto esemary xinukutumehme sã nexino, tykohmãse samo, piserehkatoh sã roropa toto ekahmaryhtao Ritonõpo nenyokyhpyry a!

⁷ Ahno apoitoh tyrise exiryke eya xine japoitohme zae rokẽ jahtao eya xine; eutary tahkase eya xine japoitohme.

⁸ Yrome, zuaro pyra toto ahtao, tonahkasẽme exĩko mã toto. Tynyrihpyrykõ ao tapoisẽme exĩko mã toto; epukãko mã toto zaka, osenahkãko mã toto.

⁹ Mame atãkyemãko ase Ritonõpo Jesẽ nyrihpyry poko; tãkye exĩko ase typynanohse jexiryke eya, joorihtoh winoino.

¹⁰ Yronymyryme ynara ãko ase: “Omoro rokẽ mase, Ritonõpo, imepỹ pyra mana asã exikety! Jamihme pyra exiketõ ewomãko mase, toto poko pyra jamihmãkõ ehtohme, tymõkomokãkara ewomãko mase omise exiketõ roropa iiryhmananõ winoino.”

¹¹ Popyra exiketõ ykerekeremãko mã toto; jyhxirõko mã toto popyra ehtoh poko ipoko pyra jahtao.

¹² Kurãkõ riryhtao ya jepehmãko mã toto popyra ehtoh ke, morara exiryke ihtomãko ase.

¹³ Yrome kure pyra toehse mokaro ahtao upo tamuruse ya jemynyhmatoh ke, otuhpyra roropa exiase. Tupue jupuhpyry yriase, oturuase Ritonõpo a toto poko.

¹⁴ Oturuase Ritonõpo a jepe poko jotururu samo, jakorõ poko sã roropa. Toytoytose ywy tupuehme samo, jemynyhmaryke, xitakety sã tyse poko.

¹⁵ Yrome tyhtomase jahtao, mokaro tãkye toehse mã toto, oximõme tooehse toh nexiase jomye, jeunohtohme. Typipohse exiase imehnomo a, zuaro pyra exiketomo a, tapurose ywy eya xine toiro rokẽ pyra.

¹⁶ Pakaihkapỹ poihtory ahno a, moro sã jeunohnõko mokaro nexiase. Xihpyryme jenẽko toh nexiase, yse pyra sã ipunaka.

¹⁷ Otãto ise ro hma, Ritonõpo, enẽko rokẽ mahno? Kuewomako mokaro winoino atatapoiryhtao yporemãkatohme. Kypynanohko mokaro reão tomo a jesekaryino.

¹⁸ Mame “Kure mase,” ãko ase jarao, ahno netaryme; oeahmãko ase imoihmãkõ rãnao.

¹⁹ Tãkye jepetõkara onyripopyra exiko yporemãkary poko; ajohpãkõ mokaro. Yzehno mã toto, popyra toto onyripyra jahtao. Tãkye mokaro onyripopyra exiko, aexianarykõino typoremãkapose jahtao oya.

²⁰ Aotururuhtao osepemãkõ sã pyra mã toto; yrome ajohpe rokẽ mã toto, imehnõ zae ehtoh se exiketõ kerekeremãko mã toto.

²¹ Jyhxirõko mã toto, kohtãko mã toto: “Onyrihpyry ynanenease!”

²² Yrome, Ritonõpo Jesemy, emero tonese oya. Naeroro mynyhme pyra exiko, Ritonõpo, ameke pyra exiko ywino!

²³ Apakako, Ritonõpo, jewomatohme! Owõko, Jesemy, zuruko toto zae ynyriry poko!

²⁴ Ritonõpo Jesemy, zae rokẽ mase. Naeroro mokaro zuruko zae jehtoh poko. Tãkye jepetõkara onyripopyra exiko yporemãkapory poko!

²⁵ Ynara kamexipopyra exiko oseya xine: “Mokyro tonahkase kyya xine. Moro se rokẽ sexiatose.”

²⁶ Mokaro, atãkyemaketõ jetuarimary poko, iporemãkapory se ase oya, toto ehxirotohme ipunaka! Mokaro ehxirory se ase, ymotye kure tõsekarose ynaroro exiryke.

²⁷ Yrome atãkyemãko kohtãko roropa mokaro mana zae jehtoh ekary etary se exiketomo! Ynara kakehpyra ase eya xine: “Imehxo kuhse Ritonõpo mana! Jamaro mana kure rokẽ emero toehse ahtao ipoetory maro.”

²⁸ Mame anamonohpyra oehtoh poko imehnõ zurũko ase, oeahmãko ase, kure rokẽ oriry poko kohmãnõko ase.