Saumu 29 - Ritonõpo Omiry: A Bíblia Sagrada na língua Aparai do Brasil

Ritonõpo jamitunuru tyryrykane konõto ao

Tawi nymerohpyry.

¹ Kuesẽkõ eahmatoko, Ritonõpo nenyohtyamo; imehxo aehtoh eahmatoko, jamihmehxo aexiryke eahmatoko roropa.

² Ritonõpo saerehkatoh ekarotoko imehnomo a; oesekumurukõ po oporohtoko Kuesẽkõ Kurã ẽpataka tõsenepose ynororo ahtao.

³ Ritonõpo omiry osetãko mana tuna tõ epoe; Ritonõpo Imehxo Exikety takararahãko mana, tuna konõto epoe aomiry osetãko mana.

⁴ Ritonõpo omiry tyjamitunuru ke pehme mana; tuisamehxo toehtoh ke pehme roropa mana.

⁵ Wewe konõto apupari tahkãko aomiry mana. Apupari tahkãko mana ypy tõ Ripano po.

⁶ Ypy tõ Ripano pyhseky kamexipõko mana pui poenõ samo; Ypy Heremõ pyhseky kamexipõko mana pui mũkuru wãtasene exikety samo.

⁷ Neneneh kamexipõko Ritonõpo omiry mana.

⁸ Ona tonorẽ tykytyky kamexipõko aomiry mana. Ona tonorẽ Kate tykytyky kamexipõko Ritonõpo omiry mana.

⁹ Wewe karawario tykytyky kamexipõko Ritonõpo omiry mana. Ituary emapõko mana wewe tõ poe. Moro sã toehse ahtao Ritonõpo Tapyĩ Kurã tao ynara kohtãko mã toto: “Saeremehxo Ritonõpo mana, imehxo mana,” ãko toto.

¹⁰ Tuisame Ritonõpo Kuesẽkõ mana, tuna tõ zueme exiketõ epoe; Tuisame, jũme exikehpyra mana.

¹¹ Typoetory tomo a tyjamitunuru ekarõko Ritonõpo mana, kure rokẽ toto rĩko roropa mana; eya xine kurãkõ emero ekarõko roropa mana.