Saumu 28 - Ritonõpo Omiry: A Bíblia Sagrada na língua Aparai do Brasil

Takorehmapotoh Ritonõpo a

Tawi nymerohpyry.

¹ Ritonõpo Jewomane, okohmãko ase; kuakorehmako! Otato exiko. Jezuhpyra awahtao, mokaro orihketõ maro exĩko ase, yhtõko mã toto aorihtyã esaka.

² Jomiry etako okohmaryhtao ya jakorehmatohme oya, jemary tõ anymyryhtao ya Atapyĩ kurã ẽpataka.

³ Juãnohpyra exiko iirypyryme exiketõ maro, popyra ehtoh poko exikehpyra exiketõ maro. Osepeme sã oturũko mã toto, yrome ikurohtao xine popyra mã toto.

⁴ Mokaro zuãnohko inyrityã epehpyryme, popyra toto nyrityã emetakame. Popyra exiketõ zuãnohko tyyrypyhpyke toexirykõke.

⁵ Tuaro toexirykõ se pyra mã toto Ritonõpo nyrihpyry poko. Inyrityã tyjamitunuru ke, morohne poko osenetupuhpyra mã toto; naeroro toto wãnohnõko mana, jũme toto enahkapõko mana.

⁶ “Kure mase,” sykatone Ritonõpo Kuesẽkomo a, jomiry totase eya exiryke tykohmase ahtao ya jakorehmatohme.

⁷ Jewomãko Ritonõpo mana, yjamitunurume roropa mana; Jesẽme enetupuhnõko ase. Jakorehmãko mana; morara exiryke atãkyemãko ase, eremiatoh kurã eremiãko ase Ritonõpo eahmaryme.

⁸ Typoetory tõ ewomãko Kuesẽkõ mana. Inymenekahpyry tuisame ewomãko mana.

⁹ Opoetory tõ ipynanohko, Ritonõpo, kure rokẽ toto tyriko opoetoryme aexirykõke! Kaneru pyno exikety sã opoetory tõ pyno exiko, jũme toto pyno exiko.