Saumu 26 - Ritonõpo Omiry: A Bíblia Sagrada na língua Aparai do Brasil

Zae ehtoh poko exikety otururu Ritonõpo a

Tawi nymerohpyry.

¹ Ritonõpo Jesemy, zae exiketyme kuekaroko zae ehtoh poko jexiryke, oenetuputyryke ya roropa yronymyryme.

² Kueneko ukurohtao, ikuhko roropa, Ritonõpo; ypenetatoh apiakako josenetupuhtoh roropa.

³ Ypyno exikehpyra oexiryke zae osema ae jarõko mase; anamonohpyra oexiryke jarokehpyra mase.

⁴ Ajohpãkõ maro ytoytopyra ase, kurãkõ panõ ajohpe exiketõ maro osepeme pyra ase.

⁵ Popyra exiketõ maro oximomyry se pyra ase ipunaka, zae pyra exiketõ maro ytoytopyra ase.

⁶ Ritonõpo, osemahnõko ase zae jehtoh waro imehnõ ehtohme. Okyryry apoto apõ zomye ytoytõko ase imehnõ oeahmananõ maro,

⁷ eremiãko opoko, “Kure mase,” ãko oya, onyrityã kurã ekarõko.

⁸ Ritonõpo Jesemy, atapyĩ sehxo hano, oesary; saereme oehtoh moroto mana.

⁹ Iirypyrymãkõ enahkaporyhtao oya jenahkara exiko; kypynanohko imehnõ etapananõ wãnopyryhtao oya,

¹⁰ popyra ehtoh poko exikehpyra mokaro mã toto; tineru apoiry sehxo mã toto zae pyra toehtamitume.

¹¹ Yrome ywy, zae ehtoh poko rokẽ ase, kypynanohko, juãnohpyra exiko roropa.

¹² Towomase ywy popyra ehtoh ypoko pyra ehtohme; Ritonõpo poetory tõ oximomyryhtao Ritonõpo eahmãko ase, Kuesẽkomo.