Saumu 25 - Ritonõpo Omiry: A Bíblia Sagrada na língua Aparai do Brasil

Kuakorehmako, kuewomako, katoh Ritonõpo a

Sero saumu tymerose Tawi a.

¹ Ritonõpo Jesemy, oya jotururu se hano.

² Jesemy, oenetupuhneme ase. Kypynanohko eporemãkapopyra jehtohme, ehxiropyra jehtohme; jepetõkara anãkyemapopyra exiko, yporemãkapory se exiketomo.

³ Oenetupuhnanõ ehxiropyra exĩko mã toto, toto onyporemãkapopyra oexiryke. Yrome mokaro orumekary se exiketõ poremãketõme exĩko mã toto.

⁴ Ritonõpo, kuamorepako zae onyriry tõ poko! Oesemary tõ kurã enepoko ya.

⁵ Kuamorepako zae ehtoh poko jehtohme, zae rokẽ oexiryke, Jesẽme mase, Ritonõpo, Ypynanohne. Jũme oenetupuhnõko ase.

⁶ Ritonõpo, wenikehpyra exiko kure oehtopõpyry poko yna a, yna pyno oehtopõpyry, moino ro moro menepoase yna a.

⁷ Moino ro iirypyryme toehse ywy, poetome ro jahtao azahkuru jehtopõpyry poko owenikehko. Yna pyno oexiryke, kure roropa oexiryke wenikehpyra exiko ypoko, Ritonõpo, Jesemy!

⁸ Zae Ritonõpo mana, kure roropa, naeroro iirypyryme exiketõ amorepãko mana zae ehtoh poko toto ehtohme.

⁹ Imehnõ motye kure osekaropyra exiketõ arõko Ritonõpo mana zae ehtoh esemary ae. Toto amorepãko mana ise toehtoh poko.

¹⁰ Tõmihpyry anamonohpyra mana, kypyno xine toexiryke aomihpyry onurumekara exiketõ amorepãko mana, Ritonõpo omiry omipona se exiketomo.

¹¹ Ritonõpo Jesemy, õmihpyry omipona exiko, yyrypyry tõ ikorokako, tuhke toehse exiryke!

¹² Ritonõpo enetupuhnanõ tosẽkõme ipoe tuaro exĩko mã toto tosemarykõ poko zae toehtohkõme.

¹³ Kure rokẽ osesarĩko mã toto osa kurã po, ipoenõkõ roropa moro nono kurã esẽme exĩko mã toto.

¹⁴ Ritonõpo Kuesẽkõ, osepeme mana Tosẽkõme enetupuhnanõ maro. Toto amorepãko mana tõmihpyry poko, tynyripohpyry poko eya xine.

¹⁵ Ritonõpo wino tahxime enẽko ase, ypynanohnõko mana popyra ehtoh winoino.

¹⁶ Ritonõpo, kueneko; ypyno exiko, toiroro jexiryke towomaneke pyra roropa jexiryke!

¹⁷ Torẽtyke jehtoh ikorokako ukurohtao, kypynanohko popyra ehtoh winoino emero porehme.

¹⁸ Jetuarimatoh eneko, sam katoh ya roropa, yyrypyry tõ ikorokako emero porehme.

¹⁹ Jepetõkara eneko tuhke toto exiry waro oehtohme; yzehno toto ehtoh eneko roropa.

²⁰ Kuewomako, kypynanohko roropa; yporemãkapopyra exiko jyhxiroryino. Oya oehnõko ase josewomapotohme.

²¹ Emese kure oehtoh enetuputyryke ya kuewomako ajohpe pyra jexiryke, zae ehtoh se jexiryke.

²² Ritonõpo, opoetory tõ Izyraeu tõ ipynanohko popyra ehtoh wino emero porehme.