Saumu 23 - Ritonõpo Omiry: A Bíblia Sagrada na língua Aparai do Brasil

Kaneru pynoto sã Jesẽ mana

Sero saumu tymerose Tawi a.

¹ Jesẽ ypyno mana kaneru pynoto samo; emero nae exikety sã ase ukurohtao.

² Osa kurã po toky tõ eremapõko esẽ mana, tuna kurã pona toto arõko roropa mana.

³ Moro saaro yjamihtanohnõko Jesẽ mana, ya oserematoh ekarõko roropa mana ukurohtao. Zae ehtoh poko jakorehmãko mana tõmihpyry ae ro.

⁴ Jemynyhmaryhtao yronymyryme enaromyra ase ymaro oexiryke, Ritonõpo Jesemy; jewomãko mase, zae tyritoh enepõko mase ya azamaro jehtohme.

⁵ Otuhtoh konõto rĩko sã mase jotuhtohme tomyehmase jahtao jepetõkara a. Oty kara ase toahmase jexiryke oya, tãkye ase oepeme jekaroryke oya, pehme sã ase ukurohtao ypyno oexiryke.

⁶ Ypyno exikehpyra mase, kure rokẽ jyrikehpyra roropa mase jorikyry ponãmero. Mame atapyĩ taka ytõko ase osesarise, jũme oesary mã jesaryme exĩko mana.