Saumu 20 - Ritonõpo Omiry: A Bíblia Sagrada na língua Aparai do Brasil

Oturutopõpyry orẽpyra toehtohme

Sero saumu tymerose Tawi a.

¹ Tuisa, oxitaryhtao Ritonõpo netaryme, õmiry etary se ynanase eya, oezukuru se ynanase eya! Oewomary se ynanase Ritonõpo a, Jako Esemy!

² Opynanohtoh enehpory se ynanase Ritonõpo a, Tytapyĩ tae, ãkorehmary se ynanase eya, ypy Xião poe!

³ Onekarotyã eya emero apoiry se ynanase eya, onyahkatyã apoto apõ po emero Ritonõpo zamaro se ynanase!

⁴ Ise oehtoh, tuisa, ekaropory se ynanase Ritonõpo a, tyriry se oehtoh tyripory se ynanase eya.

⁵ Mame kohtãko ynanase atãkyemaryme, oepetõkara typoremãkase oya exiryke, Ritonõpo eahmaryme atãkyemãko ynanase orẽpyra toehse oexiryke. Tuisa, onekaropory tõ Ritonõpo a, ekaropory se ynanase eya emero porehme!

⁶ Tuisa: Seromaroro zuaro ase: tuisame tynymenekahpyry rĩko orẽpyra Ritonõpo mana. Tosary poe kapu kurã poe ezuhnõko mana, tyjamitunuru ke orẽpyra mokyro rĩko mana.

⁷ Toitoine ahno ynara ãko: “Orẽpyra ase tykahuke jexiryke etonatohme,” ãko. Imehnõ ynara ãko: “Tykawaruke jexiryke orẽpyra ase,” ãko roropa. Yrome kymarokõ Ritonõpo Kuesẽkõ jamitunuru enetupuhnõko sytatose.

⁸ Mokaro osetapãko mã toto, epukãko roropa mã toto, yrome kymarokõ owõnõko sytatose xikihme, orẽpyra exĩko sytatose.

⁹ Ritonõpo, yna Esemy, orẽpyra tuisa tyriko! Yna ezuhko yna akorehmatoh ekaroporyhtao oya.