Saumu 2 - Ritonõpo Omiry: A Bíblia Sagrada na língua Aparai do Brasil

Ritonõpo nymenekahpyry tuisame

¹ Oty katohme atamorepãko sero nono põkõ nae Ritonõpo poremãkapory poko? Toiparo rokẽ moro poko osenetupuhnõko mã toto.

² Sero nono põkõ tuisary tõ typyrekõ rĩko mã toto, kowenu poko erohketõ maro atamorepãko mã toto Ritonõpo epeme pyra toehtohkõme, tuisame inymenekahpyry epeme pyra toehtohkõme roropa.

³ Ynara ãko mã toto: “Tuisame mokaro ehtoh surumekatone; mame inyripohpyry kyya xine senahkatone.”

⁴ Tapõ po Exikety kapu ao exianãko mana; mokaro eunohnõko Kuesẽkõ mana.

⁵ Mame tohne toexiryke mokaro zurũko mana, toto enaroximãko mana tyjamitunuru ke, toto zehno toexiryke.

⁶ Ynara ãko mana: “Ynymenekahpyry yriase tuisame japõ po, moroto Jerusarẽ po, ypy Xião kurã po.”

⁷ “Jarao omi ekarõko ase,” ãko tuisa mana. “Ritonõpo omiry ekarõko ase. Ynara nase ya: ‘Umũkurume mase; seroae omyme toehse ywy.

⁸ Ekaropoko ya, imeimehnõ nonory põkõ ekarõko ase oya opoetoryme toto ehtohme; sero nono emero ononoryme exĩko mana.

⁹ Toto esẽme exĩko mase omyxiry mã kurimene risẽme exĩko; zae pyra exiketõ wãnohnõko mase oripo ehmory sã topu pona.’ ”

¹⁰ Naeroro etatoko, tuisa tomo; otato ehtoko, kowenu poko erohketomo!

¹¹ Kuesẽkõ eahmatoko tomeseke samo. Tykytyky kaxitoko, oesekumurukõ po oporohtoko ẽpataka;

¹² ozehno xine aexiryino te, oenahkaryino oesemary ae oytoryhtao. Tãkye matose exĩko oewomaneme Ritonõpo riryhtao oya xine!