Saumu 17 - Ritonõpo Omiry: A Bíblia Sagrada na língua Aparai do Brasil

Tawi oturutopõpyry Ritonõpo a

Sero saumu tymerose Tawi a.

¹ Ritonõpo Jesemy, jomiry etako, zae ehtoh ekaropõko rokẽ hano! Jotururu etako, kuakorehmako, josekarory etako oya, ajohpe pyra jexiryke.

² “Zae mase,” kary etary se ase, õmiry ya, zae ehtoh waro oexiryke.

³ Josenetupuhtoh waro mase, jenẽko mase ukurohtao, koko ahtao, tukuhse jahtao oya yyrypyry poko ypenetatoh onenepyra mase. Azamaro pyra exikety poko oturupyra ase oya,

⁴ imehnõ orutua kõ sã pyra ase. Õmihpyry omipona toehse ywy, imehnõ ryhmananõ ehtoh sã pyra ase.

⁵ Osema kurã ae ytokety sã, õmiry omipona ase, azahkuru ehtoh poko pyra exiase.

⁶ Ritonõpo, oya oturũko ase, jezukuruke oya. Naeroro jomiry etako, jotururu oya.

⁷ Ypyno oehtoh, enepoko ya, kurano. Yna pynanohneme mase. Amaro yna ahtao osewomãko ynanase yna poko pyra yna zehnotokõ ehtohme.

⁸ Kuewomako, oenuru ewomary sã oya; taporihke exikety typoenõ ewomary sã, taporiry zopikoxi,

⁹ otonẽxi amaro, ypoko pyra popyra exiketõ ehtohme. Yzehnotokõ jomye mã toto.

¹⁰ Imehnõ enupunara mã toto, zurũko mã toto epyrypaketõ samo.

¹¹ Ameke pyra jekahmãko mã toto. Seromaroro jomye toehse mã toto jematoh eraximãko mã toto, nono pona.

¹² Reão tõ sã mã toto, tõtonẽse jeraximãko toto yyryhmatohme.

¹³ Osehko, Ritonõpo, Jesemy, atatapoiko jepetõkara maro, toto enahkatohme. Atapemã ke kypynanohko popyra exiketõ wino.

¹⁴ Ritonõpo, kypynanohko mokaro orutua kõ wino; sero nono po ipenetatohkõ nae mã toto emero porehme! Zuãnohko toto etuarimatoh ke onukurãkahpyry toto epehpyryme. Moro etuarimatoh ipune tyriko roropa toto poenomo wãnohtohme, ipakomotyã etuarimatohme roropa.

¹⁵ Yrome oenẽko ase, azahkuru pyra jexiryke; mame typakase ropa jahtao, oẽpataka atãkyemãko ase oeneryke ya.