Saumu 16 - Ritonõpo Omiry: A Bíblia Sagrada na língua Aparai do Brasil

Ymaro Ritonõpo exikehpyra mana

Sero saumu tymerose Tawi a.

¹ Kuewomako, Ritonõpo, oenetuputyryke ya, towomase ywy oya!

² Ritonõpo a ynara ase: “Omoro mase Jesemy; ymõkomory kurã emero onekarohpyryme mana.”

³ Kure rokẽ mã mokaro, Ritonõpo omipona exiketomo! Atãkyemãko ase toto maro jahtao.

⁴ Etuarimãko mã mokaro imehnõ neponãmary ekahmananomo. Toto maro ytopyra ase, tynekarorykõ etaparyhtao eya xine; ineponãmarykõ oneahmara ase.

⁵ Omoro rokẽ mase ymõkomoryme, Ritonõpo Jesemy, omise jahtao ise jehtoh ya ekarõko mase, jesemary ae jarõko mase.

⁶ Kure rokẽ jyrĩko mase! Onekarory kurã poko tãkye rokẽ ase, osenuruhkãko ase!

⁷ Ritonõpo, oeahmãko ase Jesẽme oexiryke. Jamorepaneme mase zae jehtoh poko, koko josenetupuhtoh ekarõko mase ya.

⁸ Ynara zuaro ase: Ritonõpo ymaro exikehpyra ehtoh waro ase. Ameke pyra mana, emero rokẽ toehse ahtao, enaromyra ase.

⁹ Morara exiryke tãkye ase osenetupuhnõko opoko. Orihketyme ro jahtao, torẽtyke pyra ase, oenetuputyryke ya.

¹⁰ Oya, Ritonõpo, towomase jexiryke jurumekara mase aorihtyã esao jahtao. Onymenekahpyry kurã onymotanohpopyra mase.

¹¹ Oya, isene exiketõ esemary poko tutuarõtanohpose ywy. Ymaro oexiry jãkyemãko mana, yzamaro exikehpyra mana jũme.