Saumu 149 - Ritonõpo Omiry: A Bíblia Sagrada na língua Aparai do Brasil

Eremiatoh sero Ritonõpo eahmaryme

¹ “Kure mase, Ritonõpo,” sykatone! Eremiatoh kasenato ke eremiatoko Kuesẽkõ eahmaryme. Eahmatoko ipoetory tõ anamonohpyra exiketõ oximõtoh tao.

² Atãkyematoko, Izyraeu tomo, Ritonõpo Oesẽkõ poko. Oseahmatoko, Jerusarẽ põkomo, Otuisarykõ poko.

³ Ritonõpo eahmatoko, Kuesẽkomo, awatoko mokyro eahmaryme; pãteru tõ etory ke rira tõ etotoh ke roropa.

⁴ Kuesẽkõ zamaro ipoetory tomo; imehnõ motye osekaropyra exiketõ orẽpyra tyripõko mana.

⁵ Ah Ritonõpo poetory tõ tãkye nexĩ toto topetõkara typoremãkase tyya xine exiryke, tãtãkyemarykõme tõseahmarykohtao.

⁶ Ah Ritonõpo eahmã toto opore toremiarykõme, tytapemãkõ taere exiketõ ke tomahpo xine

⁷ imehnõ nonory põkõ poremãkatohme, ahno tõ wãnohtohme;

⁸ ituisary tõ myhtohme keti tõ ke, kowenu poko erohketõ roropa kurimene risẽ keti tõ ke;

⁹ ahno tõ wãnohtohme Ritonõpo nyripohpyry ae ro! Moro sã orẽpyrahxo ipoetory tõ exĩko mana, anamonohpyra exiketomo. “Kure mase, Ritonõpo,” sykatone!