Saumu 146 - Ritonõpo Omiry: A Bíblia Sagrada na língua Aparai do Brasil

Ritonõpo eahmary, jũme Tuisame exikety

¹ “Kure mase, Ritonõpo,” sykatone! “Kure mase, Ritonõpo,” ãko ase, opyno jexiryke yronymyryme.

² Isene ro jahtao Ritonõpo oneahmakehpyra ase, eremiãko ase eahmaryme joorikyry ponãmero.

³ Ahno onyripyra ehtoko opynanohnekõme, tuisame toto ahtao ro; opynanohsaromepyra mã toto orihketõme rokẽ toexirykõke.

⁴ Toorihse toto ahtao, nonome exĩko ropa mã toto, morara ahtao tyriry se aexihpyry tonahse exĩko toh mana.

⁵ Tãkye mã mokyro takorehmaneke Ritonõpo ke, Jako esemy; tosẽme Ritonõpo enetupuhnõko mana typynanohneme.

⁶ Kapu Rihpõme mã ynororo te, sero nono te, tuna konõto maro, nakuaõkõ maro emero porehme! Tõmihpyry omipona exikehpyra Kuesẽkõ mana;

⁷ tyrohmanohpose exiketõ ewomãko mana, omise exiketomo a tonahsẽ ekarõko mana. Ãpuruhpyry taõkõ tũtanohpõko ropa Ritonõpo Kuesẽkõ mana,

⁸ tonurãkara tonure tyrĩko ropa mana. Aepukatyã anỹnõko ropa mana, tõmiry omipona exiketõ pyno mana.

⁹ Katonõ imehnõ nonory poe aehtyã kynonorykõ pona ewomãko mana, pytỹpo tomo te, poetõpo tõ roropa akorehmãko mana, yrome popyra ehtoh poko exiketõ anakorehmara mana.

¹⁰ Tuisame exikehpyra Kuesẽkõ mana. Jerusarẽ põkomo, jũme Oesẽkõ tuisame exikehpyra mana. Kure mase, Ritonõpo!