Saumu 143 - Ritonõpo Omiry: A Bíblia Sagrada na língua Aparai do Brasil

Ritonõpo enetuputyry poko

Tawi nymerohpyry.

¹ Ritonõpo, jomiry etako! Zae oexiryke kuetako; kuezuhko anamonohpyra oexiryke!

² Opoetoryme jexiryke japiakara exiko, zae nymyry pyra ynanase emero porehme oneneryme.

³ Yzehno exiketomo a tokahmase ywy japoitoh pona, typoremãkase ywy eya xine ipunaka. Ãpuruhpyry xinukutumã taka tõmase ywy eya xine, pake aorihtyã sã ase.

⁴ Naeroro apotũkehnõko ase, ehtomãko ase, enahkety sã ase ukurohtao.

⁵ Pake ehtopõpyry poko wenikehpyra ase, onyrityã poko osenetupuhnõko ase; wenikehpyra ase onyrityã poko emero.

⁶ Jemary tõ anỹnõko ase oneneryme, Ritonõpo, jotururume oya; nono tonorẽ sã tuna zehnãko ase opoko.

⁷ Axĩ ke kuezuhko, Ritonõpo Jesemy tapotũkehse jexiryke oeraximary poko. Ywino otonẽpyra exiko, jorikyryino imehnõ orihketõ maro.

⁸ Ẽmepyry ae rokẽ kuruko ropa ypyno oehtoh poko, oenetuputyryke ya ypynanohneme. Oturũko ase oya; zae ehtoh riry poko tuaroh kamexipoko.

⁹ Ritonõpo, kypynanohko yzehnotokõ wino, oya ytõko ase jewomatohme.

¹⁰ Omoro mase Ritonõpo Jesemy; kuamorepako õmiry omipona jehtohme. Kure rokẽ kyriko, kuakorehmapoko Ouzenu a zae jesemary ae jytotohme, towomaneke jehtohme.

¹¹ Kypynanohko, Ritonõpo, õmihpyry ae ro ya! Kure oexiryke kuanỹko jetuarimatoh wino.

¹² Ypyno oexiryke mokaro yzehno exiketõ etapako; yyryhmananõ enahkapoko, opoetoryme jexiryke.