Saumu 141 - Ritonõpo Omiry: A Bíblia Sagrada na língua Aparai do Brasil

Oturutoh Ritonõpo a kokonie pukuro

Tawi nymerohpyry.

¹ Ritonõpo, okohmãko ase; axĩ ke osehko jakorehmase! Jotururu etako okohmaryhtao jakorehmary ekaroporyhtao.

² Joturutoh apoiko ixtaratu samo ynekaroryme oya, jemary anymyry roropa ynekaroryme kokonie pukuro.

³ Ritonõpo, ỹtary erase tyriko, aomi popyra oturupyra jehtohme.

⁴ Kukurãkako zae pyra ehtoh poko se pyra jehtohme, popyra exiketõ maro oximaro pyra jehtohme iirypyrykõ poko. Kuakorehmako ytopyra jehtohme jũme toto otuhtoh konõto pona!

⁵ Otarame zae exiketõ juãnohnõko mã toto, otarame jupokãko roropa mã toto ypynotome toto ahtao; yrome popyra exiketomo a jeahmary se pyra ase ipunaka. Oturukehpyra ase Ritonõpo a popyra ehtoh poko exiketõ akorekehkatohme eya.

⁶ Mokaro tuisary tõ tomase ahtao ypy topu poe, kaino; enetupuhnõko mã toto, zae jomihpyry ehtopõpyry poko.

⁷ Apotopokõ takohse ahtao, tyrakase roropa ahtao, moro saaro mokaro zehpyry tõ typahse exĩko zonẽtopõpyrykõ eutary pũto.

⁸ Yrome, Ritonõpo Jesemy, oenetupuhnõko ase, amaro osewomãko ase. Jorihmapopyra exiko.

⁹ Kypynanohko tarãpa tõ wino tyrise ahtao popyra exiketomo a japoitohme. Kypynanohko popyra ehtoh poko exiketõ jarakapyhpyry tõ wino, inapurupotoh tae.

¹⁰ Ah popyra exiketõ nepukã toto apoitoh taka, tynyrihpyrykõ aka, jeparyhtao josewomatoh taka.