Saumu 138 - Ritonõpo Omiry: A Bíblia Sagrada na língua Aparai do Brasil

“Kure mase, Ritonõpo,” kary poko

Tawi nymerohpyry.

¹ Kure mase, Ritonõpo, oeahmãko ase yronymyryme; imehnõ ritõ tõ neneryme eremiãko ase oeahmaryme.

² Yna pyno oexiryke te, anamonohpyra roropa oexiryke, jesekumuru po porohnõko ase oeahmatohme Atapyĩ kurã myhtokoxi. Ynara menepoase ya, emero motye oesety mana, õmiry roropa emero motye mana.

³ Kuezukuase okohmaryhtao ya, ajamitunuru ke jamihme kyriase ropa ukurohtao.

⁴ Ritonõpo yna Esemy, tuisa tõ emero sero nono po oeahmãko mã toto õmiry etaryhtao tyya xine.

⁵ Eremiãko mã toto onyrityã poko, saerehkatoh sã imehxo oehtoh exiryke.

⁶ Kaehxo awahtao ro sero nono epoe, osanume exiketõ pyno mase, epyrypaketõ roropa otonẽsaromepyra mã toto owinoino.

⁷ Tomyehmase jahtao popyra ehtoh ke, jewomãko mase. Yzehnotokõ poremãkãko mase; ypynanohnõko mase ajamitunuru ke.

⁸ Õmihpyry ae ro ya tyrĩko mase emero. Ritonõpo Jesemy, jũme ypyno oehtoh exikehpyra mana. Oerohtoh onurumekara exiko, erohko ro onyriry otyhkatohme.