Saumu 136 - Ritonõpo Omiry: A Bíblia Sagrada na língua Aparai do Brasil

Eremiatoh kure Ritonõpo riry poko

¹ “Kure mase,” kahtoko Kuesẽkomo a, kure aexiryke; kypyno xine exikehpyra mana.

² “Kure mase,” kahtoko Ritonõpo Imehxo Exikety a; kypyno xine exikehpyra mana.

³ “Kure mase,” kahtoko tuisamehxo Exikety a; kypyno xine exikehpyra mana.

⁴ Ritonõpo rokẽ osenuruhkatoh Rihpõme mana; kypyno xine exikehpyra mana.

⁵ Tuaro toehtoh ke kapu Rihpõme mana; kypyno xine exikehpyra mana.

⁶ Sero nono tyrise eya tuna zueme aexityã po; kypyno xine exikehpyra mana.

⁷ Xixi tyrise eya, nuno roropa; kypyno xine exikehpyra mana.

⁸ Saeremehxo xixi ehtohme saereme ahtao; kypyno xine exikehpyra mana.

⁹ Nuno te, xirikuato tõ maro ezurume ehtohme koko; kypyno xine exikehpyra mana.

¹⁰ Ejitu poenõ apitoryme aenurutyã totapase eya; kypyno xine exikehpyra mana.

¹¹ Ejitu poe Izyraeu tõ tarose eya; kypyno xine exikehpyra mana.

¹² Tarose toto tomary jamihmã ke, tapory jamitunuru ke roropa; kypyno xine exikehpyra mana.

¹³ Tuna konõto Tahpiremã tapiakase eya irãnaka; kypyno xine exikehpyra mana.

¹⁴ Irãnakuroko typoetory tõ tarose eya; kypyno xine exikehpyra mana.

¹⁵ Yrome Ejitu tuisary tynerymapose eya isoutatu tõ maro; kypyno xine exikehpyra mana.

¹⁶ Ona tonorẽ poro Izyraeu tõ tarose eya; kypyno xine exikehpyra mana.

¹⁷ Imehnõ nonory esẽkõ jamihmãkõ totapase eya; kypyno xine exikehpyra mana.

¹⁸ Tuisa tõ imehxo exiketõ totapase eya; kypyno xine exikehpyra mana.

¹⁹ Seõ, amoreu tõ tuisary totapase eya; kypyno xine exikehpyra mana.

²⁰ Oke, Pasã tõ tuisary roropa totapase eya; kypyno xine exikehpyra mana.

²¹ Typoetory tomo a mokaro nonohpyry tokarose eya; kypyno xine exikehpyra mana.

²² Typoetory Izyraeu nonoryme ehtohme moro tokarose eya; kypyno xine exikehpyra mana.

²³ Wenikehpyra kynexine ynororo kypoko xine typoremãkase kuahtao xine; kypyno xine exikehpyra mana.

²⁴ Kymarokõ tymyhpokase eya kyzehnotokõ wino; kypyno xine exikehpyra mana.

²⁵ Isene exiketomo a tonahsẽ ekaroneme mana, porehme; kypyno xine exikehpyra mana.

²⁶ “Kure mase,” kahtoko Ritonõpo kapu Esemy a; kypyno xine exikehpyra mana.