Saumu 135 - Ritonõpo Omiry: A Bíblia Sagrada na língua Aparai do Brasil

Eremiatoh sero, Ritonõpo eahmary poko

¹ Ritonõpo Kuesẽkõ eahmatoko! “Kure mase,” kahtoko eya, ipoetory tomo,

² amarokõ Itapyĩ tao exiketomo, Kuesẽkõ maro Oturutoh tao!

³ Ritonõpo eahmatoko kure aexiryke; oeremiatoko eahmaryme, pynotome aexiryke.

⁴ Jako tymenekase eya topeme aehtohme, Izyraeu tõ tymenekase eya tykyryry kurãme toto ehtohme.

⁵ Ritonõpo imehxo mana, zuaro ase; imehnõ ritõ tõ emero motye Kuesẽkõ mana.

⁶ Tyriry se toehtoh rĩko Kuesẽkõ mana: kapu ao te, sero nono po te, tuna konõto tõ kuao te, zue konõto tõ ao, enara.

⁷ Sero nono etyhpyry poe akurũ enehnõko mana, nenenehkane rĩko mana konopo maro, tyryrykane enyohnõko mana tykyryry tõ esary ae.

⁸ Ejitu tõ poenõ apitoryme aenurutyã totapase eya, ahno tomo te, eky tomo, enara.

⁹ Tyjamitunuru tonepose Ejitu põkomo a, osenuruhkatoh tonõ toto tuisarykõ wãnohtohme akorehmananõ maro.

¹⁰ Ahno tõ tuhke typoremãkase eya; tuisa tõ jamihmãkõ totapase eya.

¹¹ Seõ totapase eya, amoreu tõ tuisary, Oke, Pasã tõ tuisary roropa, Kanaã põkõ tuisary tõ roropa emero totapase eya.

¹² Typoetory tomo a mokaro nonohpyry tokarose eya; Izyraeu tomo a esarykõme ehtohme.

¹³ Ritonõpo, sero nono põkõ emero awaro exikehpyra exĩko mã toto; omoro mase yna Esemy, emero zumakahpõkomo wenikehpyra exĩko mã toto opoko.

¹⁴ Izyraeu tõ ewomãko Kuesẽkõ mana; typoetory tõ pyno exĩko mana.

¹⁵ Imehnõ neponãmarykõ parata risẽme mã kehko, uuru risẽme roropa, ahno nyrityamo.

¹⁶ Tỹtare mã kehko, yrome oturupyra; tonure roropa toh mã repe, yrome osenuhmara mã kehko.

¹⁷ Typanare toh mã repe, yrome otato pyra mã kehko; oseremara roropa mã kehko.

¹⁸ Tynyrityãkõ sã mã mokaro tyrinanomo, tuamekaro xine rokene. Mokaro roropa, tyneponãmarykõ enetupuhnanomo, tuaro pyra mã toto.

¹⁹ Ritonõpo Kuesẽkõ eahmatoko, Izyraeu tomo; “Kure mase, Ritonõpo,” kahtoko, imaro oturuketomo!

²⁰ “Kure mase, Ritonõpo,” kahtoko, Rewita tomo; Kuesẽkõ eahmatoko, emero aomipona exiketomo!

²¹ Ritonõpo eahmatoko Xião po, Jerusarẽ po, Kuesẽkõ esary po. “Kure mase, Ritonõpo,” kahtoko!