Saumu 13 - Ritonõpo Omiry: A Bíblia Sagrada na língua Aparai do Brasil

Atakorehmapotoh Ritonõpo a

Sero saumu tymerose Tawi a.

¹ Ritonõpo Jesemy, jũme ypoko tuenikehse mahno? Otara ahtao otonẽkehnõko mah, oẽmyty enetohme ropa ya?

² Otãto ise ro jetuarimatoh eanahtotohme ya? Otãto ise ro jemynyhmary ukurohtao saereme, koko, enara? Otãto ise ro yporemãkary jepetõkara a?

³ Ritonõpo Jesemy, kueneko, kuezuhko! Kyjamihtanohko ropa, orihpyra jehtohme.

⁴ Morarame jepetõkara atãkyemasaromepyra exĩko mã toto yporemãkapory poko; ynara kasaromepyra exĩko mã toto: “Mokyro typoremãkase kyya xine!”

⁵ Ypyno oehtoh enetupuhnõko ase. Atãkyemãko ase ukurohtao ypynanopyryke oya.

⁶ Naeroro eremiãko ase oeahmaryme, Ritonõpo, kure tyrise jexiryke oya.