Saumu 129 - Ritonõpo Omiry: A Bíblia Sagrada na língua Aparai do Brasil

Tyyryhmase, yrome onyporemãkara

Ytoytoketõ eremiatoh sero.

¹ Izyraeu tomo, yna zuruko oryhmatopõpyrykõ poko oepetõkara a apitorymã poe poetome ro awahtao xine.

² “Ỹ, poetome yna ehtopõpyry poe tyyryhmase ynanexiase, yrome yna onyporemãkara ro yna epetõkara toh nexiase.

³ Ỹpary tysahkase ikurohtaka sã ypipohnanomo a, mosa roropa tupito nonory ahkary samo, otyro puhturu arykatohme.

⁴ Yrome Kuesẽkomo a, zae Exiketymã, yna typynanohse mokaro popyra exiketõ winoino.”

⁵ Ah Jerusarẽ se pyra exiketõ emero typoremãkase nexĩ toto, epatohme.

⁶ Ah onahpoty sã nexĩ toto tapyi amotoh po, axĩ orihnõko mana ahtara ro ahtao;

⁷ moro onahpoty anapoipyra isahkane mana, anaropyra roropa mana pitiko rokẽ exiryke.

⁸ Ah ytoketõ mokaro kuroko ynara kara nexĩ toto: “Kure rokẽ Ritonõpo Kuesẽkomo a oriporykõ se ase! Kure oriporykõ se ynanase Ritonõpo a.”