Saumu 128 - Ritonõpo Omiry: A Bíblia Sagrada na língua Aparai do Brasil

Kure rokẽ exĩko, Ritonõpo omiry omipona ahtao

Ytoytoketõ eremiatoh sero.

¹ Tãkye mã mokaro Ritonõpo omiry omipona exiketomo, inyripohpyry omipona exiketomo.

² Morara awahtao otuhnõko mase oerohtamitume, tãkye exĩko mase, kure ehtoh oehnõko oya mana.

³ Opyty eperytakety sã exĩko atapyĩ tao mana; opoenõ oriwera zoko sã exĩko mã toto õtuhtoh zomye.

⁴ Ritonõpo omiry omipona exikety moro sã kure rokẽ exĩko mana.

⁵ Tosae, ypy Xião poe, kure rokẽ oripory se ase Ritonõpo a! Kokoro rokẽ isene ro awahtao kure Jerusarẽ põkõ riry se ase oneneryme!

⁶ Isene oexiry se ase, apakomotyã enetohme oya! Osepeme Izyraeu tõ kamexipory se ase!