Saumu 122 - Ritonõpo Omiry: A Bíblia Sagrada na língua Aparai do Brasil

Pata Jerusarẽ kure potu

Tawi nymerohpyry.

¹ Tãkye exiase ynara tykase toto ahtao ya: “Ehmaropa Ritonõpo Tapyĩ taka.”

² Seromaroro taro sytatose, omõtoh tao xikihme Jerusarẽ po!

³ Jerusarẽ tyrise ropa mana, pata kurano, moroto ahno oximõnõko mã toto.

⁴ Tarona ahno tõ onuhnõko mana, oxiekyrymãkomo, Izyraeu pakomotyamo, “Kure mase,” katohme Ritonõpo a, inyripohpyry ae ro.

⁵ Taro zae ehtoh apiakãko tuisa tõ mana, taro Izyraeu tõ tuisary roropa typoetory tõ apiakãko mana.

⁶ Oturutoko Kuesẽkomo a Jerusarẽ põkõ poko, osepeme toto ehtohme. “Kure rokẽ Jerusarẽ pyno exiketõ tyripory se ase!

⁷ Osepeme tyripoko toto pata po, apuru tõ ao exiketomo! Tuisa tapyĩ konõto tao exiketõ towomasẽme toto ripory se ase roropa.”

⁸ Wekyry tõ pyno jexiryke jepe tõ maro, ynara ãko ase Jerusarẽ põkomo a: “Osepeme oexirykõ se ase, torẽtyke pyra oehtohkõme.”

⁹ Ritonõpo Kuesẽkõ Tapyĩ sehxo ase. Morara exiryke oturũko ase Ritonõpo a opoko xine. Kure rokẽ oriporykõ se ase eya, Jerusarẽ põkomo.