Saumu 121 - Ritonõpo Omiry: A Bíblia Sagrada na língua Aparai do Brasil

Ritonõpo kuewomanekomo

Ytoytoketõ eremiatoh sero.

¹ Mya osenuhmãko ase, ypy tõ enẽko. “Ozeino jakorehmatoh oehnõko nae?” ãko, ekaropõko ase.

² Kuesẽkõ jakorehmãko mana, kapu rihpõme mã ynororo, sero nono roropa.

³ Opupuru piserehkamexipopyra mana; oewomanekõ nyhpyra mana.

⁴ Izyraeu tõ pyno exikety pimỹme exipyra mana, nyhpyra roropa mana.

⁵ Oewomãko Kuesẽkõ mana; ãpotunuru wino exikehpyra mana, oewomatohme.

⁶ Saereme ahtao xixi oryhmara exĩko mana; koko ahtao nuno oryhmara mana.

⁷ Kuesẽkõ opynanohnõko mana popyra ehtoh winoino; isene oehtoh ewomãko mana.

⁸ Oewomãko mana oytoryhtao te, oepyry ropa ahtao, seromaroro te, jũme exikehpyra, enara.