Saumu 12 - Ritonõpo Omiry: A Bíblia Sagrada na língua Aparai do Brasil

Yna ipynanohko Ritonõpo

Sero saumu tymerose Tawi a.

¹ Yna ipynanohko, Ritonõpo yna Esemy, zae ehtoh poko exiketõ tonahse mã toto, õmiry omipona exiketõ osenepyra toehse.

² Ajohpe oturũko mã toto oseya; imehnõ enekunohnõko mã toto ipyrypary ke eya xine.

³ Ritonõpo, mokaro imynyhpãkapoko imehnõ pyrypaketomo! Ĩtarykõ apuruko mokaro epyrypaketomo. Ynara ãko mã toto:

⁴ “Yna omiry ke yna penetatoh emero apoĩko ynanase. Mynyhme yna onyrisaromepyra imehnõ mana, tõmipona yna onyrisaromepyra mã toto.”

⁵ Yrome ynara ãko Ritonõpo Kuesẽkõ mana: “Seromaroro oehnõko ase, tymõkomokãkara tuarimaporyke imehnomo a, pusuh ãko mã toto sam katoh ke. Toto ewomãko ase towomarykõ se toexirykõke.”

⁶ Ritonõpo omiry zae ehtoh enetupuhnõko ase. Parata kurã sã aomiry mana tukurikase ahtao apoto ao 7me otootomosẽ pona.

⁷ Ritonõpo yna Esemy, yna onewomakehpyra exiko, yna ipynanohko yna onyryhmara popyra exiketõ ehtohme,

⁸ ynara exiryke, emero rokẽ po ytõko mã toto popyra ehtoh poko; moro poko “Kure nase,” ãko mã toto emero.