Saumu 119 - Ritonõpo Omiry: A Bíblia Sagrada na língua Aparai do Brasil

Ritonõpo nyripohpyry

¹ Tãkye matose ohxirosaromepyra imehnõ ahtao, zae ehtoh poko rokẽ awahtao xine, Ritonõpo Oesẽkõ omiry omipona!

² Tãkye exĩko mã mokaro Ritonõpo nyripohpyry omipona exiketomo, aomiry omipona exiketõme mã toto yronymyryme!

³ Tãkye mã mokaro popyra ehtoh poko pyra exiketomo, tosẽkõ Ritonõpo zae ehtoh poenohnõko mã toto!

⁴ Õmihpyry mekaroase yna a, Ritonõpo, omipona yna ehtohme tomeseke roropa.

⁵ Onyripohpyry omipona jexiry se ase ipunaka, anamonohpyra jehtohme!

⁶ Tomeseke jahtao onymeropohpyry omipona jehtoh poko ehxiropyra exĩko ase.

⁷ Yna amorepatoh tonõ kurã enetuputyryhtao ya oeahmãko ase ukurohtao tukurikase jexiryke.

⁸ Onetapohpyry ya omipona exĩko ase, ajohpame sã jũme jurumekara exiko.

Ritonõpo omiry ukurohtao

⁹ Otãto nuasemãkõ zae rokẽ ehtoh poko exĩko nae? Õmihpyry omipona exikehpyra ahtao rokẽ atapuropyra exĩko mã toto!

¹⁰ Azamaro jexiry se ase yjamitunuru ke porehme. Kuakorehmako õmiry omipona exikehpyra jehtohme, jũme.

¹¹ Õmihpyry tukurãkase ya ukurohtao, iirypyryme pyra jehtohme oya.

¹² Kure mase, Ritonõpo, oeahmãko ase! Kuamorepako onyripohpyry tõ poko.

¹³ Jarao imehnõ netaryme onymeropohpyry sekeremãko ase emero.

¹⁴ Õmihpyry omipona jehtoh yzamarohxo mana, itamurume tytineruke jexiry motye.

¹⁵ Anamorepatoh tonõ poko atamorepãko ase, zae ehtoh poko jamorepary oya enetupuhnõko ase.

¹⁶ Onyripohpyry tõ yzamaro mana; wenikehpyra ase õmiry poko.

Ise oehtoh waro se ase

¹⁷ Kure rokẽ kyriko opoetoryme jexiryke, isene ro jehtohme, jamorepatoh oya omipona jehtohme roropa!

¹⁸ Jenuru etapuruhmakako õmiry zae ehtoh enetohme ya, josenuruhkatohme.

¹⁹ Tuhke hkopyra jeimamyry aropõko ase taro nono po; onyripohpyry tõ ononẽpyra exiko ywino.

²⁰ Ukurohtao sam ãko ase torẽtyke, ise oehtoh waro se exikehpyra jexiryke.

²¹ Epyrypaketõ zupokãko mase; õmiry omipona pyra exiketomo a popyra ehtoh enehpõko mase.

²² Kuewomako jeunohnanõ wino, ypoihtonanõ wino roropa, anamorepatyã omipona toehse jexiryke.

²³ Kowenu poko erohketõ oximomyryhtao ro yporemãkatohme, ywy, opoetory atamorepakehpyra ase õmiry poko.

²⁴ Josenetupuhtoh jamorepatopõpyry poko oya sehxo ywy; jakorehmãko mana zae ehtoh menekatohme ya.

Õmihpyry omipona jexiry se ase

²⁵ Typoremãkase ywy, toepukase nono pona; õmihpyry ae ro kyjamihtanohpoko ropa.

²⁶ Osekaroase oya ynyrihpyry poko emero, mame kuezukuase; kuamorepako onyripohpyry tõ poko.

²⁷ Kuakorehmako õmihpyry enetuputyry poko ya, mame osenetupuhnõko ase, osenuruhkãko roropa ase anamorepatoh tonõ poko.

²⁸ Jemynyhmaryme tapotũkehse ywy; kyjamihtanohpoko ropa õmihpyry ae ro.

²⁹ Azahkuru ehtoh esemary apuruko moro ae ytopyra jehtohme; kure rokẽ oexiryke kuamorepako onyripohpyry poko.

³⁰ Zae ehtoh esemary tymenekase ya, tomeseke sã õmiry ymoiase omipona jehtohme.

³¹ Ritonõpo Jesemy, jamorepatopõpyry oya omipona toehse ywy; yporemãkapopyra exiko ehxiropyra jehtohme.

³² Axĩ onyripohpyry ya omipona exĩko ase, ynara exiryke: otato jahtao itamurumehxo oenetupuhnõko ase.

Kuamorepako onyripohpyry tõ poko

³³ Ritonõpo Jesemy, kuamorepako onyripohpyry tõ poko tuaro jehtohme, jũme omipona exĩko ase.

³⁴ Tuaro kyriko õmihpyry omipona jehtohme, yronymyryme omipona jehtohme.

³⁵ Kuaroko onyripohpyry tõ esemary ae, moro ae tãkye jehtoh eporỹko ase.

³⁶ Yna amorepatopõpyry oya omipona se jehtoh tyriko, mõkomo apoiry se jehtoh myakãme.

³⁷ Josenetupuh anakorekehkanopyra exiko popyra ehtoh poko; kure rokẽ kyriko õmihpyry ae ro.

³⁸ Opoetoryme ase; kyriko emero õmihpyry ae ro, onetapohpyry ae ro õmipona exiketomo a.

³⁹ Kypynanohko ypoihtonanõ omiry winoino, mokaro zuno jexiryke; kure kuhse ahno apiakary oya!

⁴⁰ Onyripohpyry tõ omipona jexiry se ase. Isene kyriko ropa zae oexiryke.

Tãkye ase õmiry poko

⁴¹ Ritonõpo Jesemy, ypynohxo oehtoh enepoko ya, kypynanohko jepetõkara winoino õmihpyry ae ro!

⁴² Mame mokaro ezukuru waro exĩko ase jyhxiroryhtao eya xine, zae õmiry enetuputyryke ya.

⁴³ Kuakorehmako ajohpe pyra rokẽ jehtohme, kure ehtoh eraximãko ase zae onyripohpyry tõ enetuputyryke ya.

⁴⁴ Kokoro rokẽ onyripohpyry omipona exĩko ase; jũme omipona exĩko ase rahkene.

⁴⁵ Torẽtyke pyra ytoytõko ase yna amorepatopõpyry tõ oya omipona se jexiryke.

⁴⁶ Onyripohpyry tõ poko oturũko ase tuisa tomo a, ehxiropyra exĩko ase roropa.

⁴⁷ Onyripohpyry tõ yzamaro mana, ipyno xine jexiryke.

⁴⁸ Otato ase onyripohpyry tõ etaryke ya ipyno xine jexiryke, atamorepãko ase onymeropohpyry tõ poko.

Õmihpyry pokoino kure ehtoh eraximãko ase

⁴⁹ Wenikehpyra exiko onetapohpyry poko ya, opoetoryme jexiryke, moro pokoino kure ehtoh eraximãko ase.

⁵⁰ Jetuarimaryhtao tomuhkehkase exiase, õmiry poe isene toehse jexiryke.

⁵¹ Jeunohkehpyra epyrypaketõ mã toto ypoko, yrome õmiry onurumekara ase.

⁵² Wenikehpyra ase pake anapiakatopõpyry tõ poko, Ritonõpo, jemuhkehkapõko mana.

⁵³ Tohne exĩko ase popyra exiketõ eneryhtao ya onyripohpyry omipona pyra aehtohkõ poko.

⁵⁴ Isene ro jahtao sero nono po eremiatoh tonõ rĩko ase onyripohpyry tõ poko.

⁵⁵ Koko ahtao wenikehpyra ase opoko, osenetupuhnõko roropa ase õmiry poko.

⁵⁶ Õmihpyry omipona jehtoh yzamaro mana: moro pokoino tãkye ase.

Õmihpyry omipona exĩko ase

⁵⁷ Ritonõpo Jesemy, ose rokẽ ase; ajohpe pyra ase onyripohpyry omipona exĩko ase.

⁵⁸ Yronymyryme ekaropõko ase oya: juãnohpyra exiko, õmihpyry ae ro.

⁵⁹ Tõsenetupuhse ywy ynyriry poko, ajohpe pyra onyripohpyry tõ omipona exĩko ase.

⁶⁰ Axiny, atarypokety sã õmiry omipona exĩko ase.

⁶¹ Ahno apoitoh tyrise jepetõkara a, japoitohme repe, yrome wenikehpyra ase õmihpyry poko.

⁶² Onoa owõnõko ase oeahmatohme yna amorepatopõpyry kurã poko oya.

⁶³ Osepeme ase opoetory tõ maro, porehme, õmihpyry omipona exiketõ maro.

⁶⁴ Ritonõpo, sero nono pehme mana, yna pyno oehtoh ke; kuamorepako onyripohpyry tõ poko.

Õmihpyry zae ehtoh enetupuhnõko ase

⁶⁵ Ritonõpo Jesemy, õmihpyry poko ya anamonohpyra mexiase, kure rokẽ kyriase, opoetoryme.

⁶⁶ Tuaro kyriko zae ehtoh poko zuaro jehtohme, õmihpyry zae ehtoh enetuputyryke ya.

⁶⁷ Juãnohpyra ro awahtao azahkuru ehtoh poko exiase, yrome seromaroro õmiry omipona ase.

⁶⁸ Ritonõpo, kure mase; kure ehtoh rĩko mase; kuamorepako onyripohpyry tõ poko.

⁶⁹ Epyrypaketõ ajohpe ehtoh ke jyhxirõko mã toto, yrome ywy, yronymyryme õmihpyry omipona ase.

⁷⁰ Mokaro orutua kõ tãtamoreparykõ se pyra mã toto õmiry poko, yrome yzamaro mana.

⁷¹ Juãnohtopõpyry kure nexiase ya, ynara exiryke: moro pokoino onyripohpyry warohxo toehse ywy.

⁷² Mõkomo kurã motye õmiry kure mana ya, tineruje motye roropa.

Josenetuputyry õmiry poko yzamaro mana

⁷³ Ritonõpo, oemary ke kyriase, kuaputyase; tuaro kyriko õmihpyry enetupuhtohme ya.

⁷⁴ Oenetupuhnanõ atãkyemãko mã toto jeneryhtao tyya xine zae õmihpyry tonetupuhse ya exiryke.

⁷⁵ Ritonõpo, zuaro ase yna apiakary oya zae rokẽ mã ipunaka, tuãnohse roropa exiase oya, ypyno exikehpyra oexiryke.

⁷⁶ Ajohpãme sã wemuhkehkapoko, ypyno oehtoh anamonohpyra oexiryke õmihpyry ae ro ya, opoetoryme!

⁷⁷ Juãnohpyra exiko isene ro jehtohme, õmiry poko josenetuputyry se jexiryke.

⁷⁸ Ah mokaro epyrypaketõ ehxiroketõme nexĩ toto, ajohpe tyhxirose jexiryke eya xine! Yrome ywy osenetupuhnõko ase anamorepatopõpyry tõ poko.

⁷⁹ Ah mokaro õmiry omipona exiketõ noehno toh ya, õmihpyry waro exiketomo!

⁸⁰ Ah onymeropohpyry omipona ehxi yronymyryme, ehxiropyra jehtohme jyporemãkapory poko.

Kypynanohko, Ritonõpo

⁸¹ Tapotũkehse ase, ypynanopyry eraximary poko oya; õmihpyry zae ehtoh enetupuhnõko ase.

⁸² Jenuru etaehnõko mã kehko josenuhmaryhtao, onetapohpyry ya eraximary poko. Ekaropoxi: “Otara ahtao oehnõko mah jemuhkehkapose?”

⁸³ Uwa eukuru ẽtypyry sã toehse ase iposohkahpyry samo, yrome onymeropohpyry tõ poko wenikehpyra ase.

⁸⁴ Otara ahtao ywy opoetory oeraximakehnõko hano? Otara ahtao mokaro wãnohnõko mah, jyryhmananomo?

⁸⁵ Eutary tõ tahkase epyrypaketomo a japoitohme; õmihpyry omipona pyra mokaro mã toto.

⁸⁶ Onyripohpyry tõ zae mã kehko emero. Kuakorehmako, tyyryhmase jexiryke ajohpe exiketomo a.

⁸⁷ Jetapaĩse toh nexiase, yrome anamorepatopõpyry tõ onurumekara ase.

⁸⁸ Ypyno oexiryke kypynanohko isene ro orẽpyra jehtohme õmihpyry omipona.

Ritonõpo omiry jũme enahpyra mana

⁸⁹ Ritonõpo Jesemy, õmihpyry jũme exikehpyra mana; enahpỹme mã kapu ao.

⁹⁰ Anamonohpyra mase jũme, emero zumakahpõkomo a exikehpyra mase; sero nono tyrise oya esaka, moro poe esyryhmara mana.

⁹¹ Onyripohpyry ae ro senohne emero exikehpyra mana seroae ro, õmiry omipona emero exiryke.

⁹² Õmihpyry yzamaro pyra ahtao, pake toorihse jexiry jetuarimary ke.

⁹³ Jũme wenikehpyra ase anamorepatopõpyry tõ poko, moro ke isene ro kyriase.

⁹⁴ Kypynanohko jepetõkara winoino opoetoryme jexiryke, onyripohpyry tõ omipona se toehse roropa jexiryke.

⁹⁵ Popyra exiketõ jeraximãko mã toto jetapatohme, yrome osenetupuhnõko ase onekarohpyry poko.

⁹⁶ Ynara zuaro toehse ywy sero nono po kurãkõ emero enahnõko mana; yrome õmihpyry jũme yna akorehmãko mana zae ehtoh poko yna ehtohme.

Õmihpyry sehxo ase, Ritonõpo

⁹⁷ Õmihpyry sehxo hano! Osenetupuhse kohmãnõko ase ipoko.

⁹⁸ Onymeropohpyry ymaro exikehpyra mana, ipokoino tuarohxo ase, jepetõkara motye.

⁹⁹ Jamorepananõ emero motye enetupuhnõko ase, jamorepatopõpyry poko oya josenetuputyryke.

¹⁰⁰ Tamuximãkõ motye enetupuhnõko ase, onyripohpyry tõ omipona jexiryke.

¹⁰¹ Popyra ehtoh poko exiketõ esemary ae ytopyra exiase, õmihpyry omipona se jexiryke.

¹⁰² Onyripohpyry tõ omipona exikehpyra ase, omoro ro jamorepaneme oexiryke.

¹⁰³ Anusasamã sã ya õmiry mana! Ano zeni motye anusasame mã ya.

¹⁰⁴ Õmihpyry enetuputyryke ya tuaro exĩko ase, morara exiryke zae pyra ehtoh emero se pyra ase ipunaka.

Õmihpyry saerehkaneme mana

¹⁰⁵ Õmiry jezurume mana zae osema ae jytotohme, saerehkaneme mana saereme jesemary ehtohme.

¹⁰⁶ Jomihpyry etapoase, moro rĩko ase, zae oya jamorepatopõpyry omipona exĩko ase rahkene.

¹⁰⁷ Ritonõpo Jesemy, etuarimãko ase itamurume; kypynanohko isene ro, õmihpyry ae ro.

¹⁰⁸ Ritonõpo, jomiry etako, “Kure mase,” karyhtao oya, kuamorepako onyripohpyry tõ poko!

¹⁰⁹ Tahxime orihsasaka ywy ahtao ro wenikehpyra ase õmihpyry poko.

¹¹⁰ Ahno apoitoh tyrise popyra exiketomo a japoitohme repe, yrome anamonohpyra exiase onyripohpyry tõ omipona.

¹¹¹ Jamorepatopõpyry oya ymõkomory kurã sã mã kehko jũme rahkene; tãkye jyrĩko mã toto ukurohtao.

¹¹² Ynara tymenekase ywy, õmihpyry omipona exikehpyra ase isene jehtoh etyhpyry pona jorikyry ponãmero.

Anamorepatopõpyry tõ se ase

¹¹³ Ajohpe exiketõ se pyra ase ipunaka, yrome õmihpyry sehxo ase.

¹¹⁴ Otonẽtohme mase ya, josewomatohme roropa mase; kure ehtoh eraximãko ase õmihpyry ae ro.

¹¹⁵ Ytotoko ywinoino popyra ehtoh poko exiketomo, Ritonõpo Jesẽ nyripohpyry omipona exĩko ase!

¹¹⁶ Jamihme kyriko ropa, õmihpyry ae ro, isene ro jehtohme; penekehpyra kamexipoko kure ehtoh eraximary poko.

¹¹⁷ Kuakorehmako, towomase jehtohme oya, jũme õmihpyry omipona exikehpyra exĩko ase.

¹¹⁸ Mokaro rumekãko mase emero õmihpyry omipona pyra exiketomo; toiparo rokẽ osenetupuhnõko mã toto imehnõ enekunohtohme.

¹¹⁹ Popyra exiketõ emero pahnõko mase typahsẽ samo, morara exiryke anamorepatopõpyry tõ sehxo ase.

¹²⁰ Tykytyky ãko ase oẽpataka, enaromỹke ase yna apiakaryke oya.

Anamorepatopõpyry tõ omipona ase

¹²¹ Zae ehtoh tyrise ya, kure ehtoh roropa; jekaropyra exiko jepetõkara a.

¹²² Õmiry etapoko ya jakorehmary poko oya, ywy ase opoetoryme. Jutuarimapopyra exiko epyrypaketomo a.

¹²³ Jenuru tõ totaehse nase josenuhmary poko, oupĩko ase ypynanohtohme oya õmihpyry ae ro.

¹²⁴ Juãnohpyra exiko opoetoryme jexiryke, yna pyno exikehpyra oexiryke, kuamorepako onyripohpyry tõ poko.

¹²⁵ Opoetoryme ase; morara exiryke tuaro kyriko anamorepatoh tonõ waro jehtohme.

¹²⁶ Ritonõpo yna Esemy, epo tyritoh oya toehse mana, onyripohpyry omipona pyra rokẽ mã toto.

¹²⁷ Õmihpyry sehxo hano uuru se jehtoh motye, uuru kurã motye.

¹²⁸ Morara exiryke anamorepatoh tonõ omipona ase; zae pyra exiketõ nyriry se pyra ase ipunaka.

Ritonõpo omihpyry omipona se hano

¹²⁹ Onyripohpyry tõ kure kuhse mã kehko, morara exiryke toto omipona ase yronymyryme.

¹³⁰ Õmihpyry poko atamorepatopo saerehkatoh sã mana, tuaro pyra exiketõ tuarõtanohnõko mana.

¹³¹ Ẽtakãko ase joserematohme, õmihpyry poko ypenetaryke, omipona se jexiryke.

¹³² Kueneko ropa, ypyno exiko roropa opyno exiketõ pyno exikehpyra oehtoh samo.

¹³³ Kuakorehmako epukara jehtohme õmihpyry ae ro; yporemãkapopyra exiko roropa iirypyryme ehtoh ke.

¹³⁴ Kypynanohko yrohmanohponanõ winoino, onyripohpyry tõ omipona jehtohme.

¹³⁵ Nupunato kueneko, opoetoryme jexiryke, kuamorepako õmihpyry poko.

¹³⁶ Iporiry sã yxity serere ãko, ikurenaka jenuru tõ poe, õmihpyry omipona pyra ahno tõ exiryke.

Õmihpyry etyorõmara mana!

¹³⁷ Zae rokẽ mase, Ritonõpo Jesemy; onyripohpyry tõ zae roropa mana.

¹³⁸ Anamorepatopõpyry tõ kure rokẽ mana, zae roropa mã kehko ipunaka.

¹³⁹ Apoto sã ase ukurohtao tohne jehtoh ke õmiry htomaryke jepetõkara a.

¹⁴⁰ Õmihpyry ya etyorõmara mana! Moro sehxo ase, opoetoryme exiketyme ase!

¹⁴¹ Epyrypara exiketyme ase kure jehtoh poko, ime pyra exiketyme jekarõko roropa imehnõ mana, yrome wenikehpyra ase anamorepatopõpyry tõ poko.

¹⁴² Zae oehtoh jũme exikehpyra mana, õmihpyry jũme zae roropa mana.

¹⁴³ Jetuarimatopo te, torẽtyke jehtoh roropa mã jerekohmãko repe, yrome onyripohpyry tõ jãkyemãko mana.

¹⁴⁴ Anamorepahpyry tõ zae rokẽ mana jũme, tuaro kyriko isene exikehpyra jehtohme.

Õmihpyry zae ehtoh enetupuhnõko ase

¹⁴⁵ Yronymyryme okohmãko ase, Ritonõpo; kuezuhko, mame onyripohpyry tõ omipona exĩko ase!

¹⁴⁶ Okohmãko ase, jakorehmatohme; kypynanohko jepetõkara winoino te, õmiry omipona exĩko ase.

¹⁴⁷ Ẽmehpyra ro ahtao, okohmãko ase jakorehmatohme, zae õmihpyry enetuputyryke ya kure ehtoh eraximãko ase.

¹⁴⁸ Nyhpyra ẽmehnõko ase josenetupuhtohme õmiry poko.

¹⁴⁹ Ritonõpo Jesemy, yna pyno exikehpyra oexiryke jomiry etako! Kypynanohko isene ro jahtao, zae ehtoh riry se oexiryke.

¹⁵⁰ Jyyryhmananõ popyra exiketõ ameke hkopyra oehnõko mã toto; jũme õmihpyry omipona pyra mã toto.

¹⁵¹ Yrome omoro, Ritonõpo, ameke pyra mase ya; onyripohpyry tõ emero zae mã kehko.

¹⁵² Moino ro anamorepatopõpyry tõ waro toehse ywy; jũme aehtohme morohne tyrise oya.

Õmihpyry zae mana ipunaka

¹⁵³ Ritonõpo, jetuarimary eneko, kypynanohko õmihpyry poko wenikehpyra jexiryke.

¹⁵⁴ Kuewomako, sero ãpuruhpyry tae kutũtanohpoko; kypynanohko isene ro, õmihpyry ae ro.

¹⁵⁵ Popyra exiketõ osepynanohpyra exĩko mã toto õmihpyry omipona pyra toexirykõke.

¹⁵⁶ Yna pyno oehtoh kure kuhse mana, Ritonõpo! Kypynanohko isene ro jahtao, zae õmihpyry ae ro.

¹⁵⁷ Jepetõkara tuhke mã toto, jyyryhmary se exiketõ roropa, yrome onyripohpyry tõ omipona exikehpyra ase.

¹⁵⁸ Mokaro ewokananõ eneryhtao ya: “Popyra mã toto,” ãko ase, toto se pyra ase õmihpyry omipona pyra toto exiryke.

¹⁵⁹ Anamorepatyã sehxo jehtoh eneko, Ritonõpo! Yna pyno oehtoh jũme etyorõmara mana, naeroro isene ro kypynanohko!

¹⁶⁰ Õmihpyry emero zae mana; onyripohpyry tõ kurã jũme exikehpyra mã kehko.

Ritonõpo nyripohpyry tõ omipona se ase

¹⁶¹ Ahno jamihmãkõ osetapãko mã toto ymaro onyryhpopãkara jahtao, yrome õmiry poko otato ase ukurohtao.

¹⁶² Tãkye kuhse ase õmihpyry poko, imepỹ tãkye ehtoh samo mõkomo kurã apoiryhtao eya!

¹⁶³ Ajohpe ehtoh se pyra ase ipunaka, zae pyra ehtoh roropa, yrome õmihpyry sehxo ase.

¹⁶⁴ Oeahmazomõko ase 7me, toiro ẽmepyry ae, anapiakatoh tonõ zae rokẽ exiryke.

¹⁶⁵ Õmihpyry sehxo exiketõ torẽtyke pyra, towomase mã toto, mokaro onemapopyra imehnõ mana.

¹⁶⁶ Ritonõpo Jesemy, ypynanopyry oya eraximãko ase jepetõkara winoino, onyripohpyry tõ omipona ase.

¹⁶⁷ Anamorepatopõpyry tõ omipona ase; toto sehxo ase yronymyryme.

¹⁶⁸ Õmihpyry omipona ase, onyripohpyry tõ roropa, ynyriry enẽko mase emero porehme.

Õmihpyry poko tãkye ase

¹⁶⁹ Ritonõpo Jesemy, okohmary ya etako, tuaro kyriko õmihpyry ae ro.

¹⁷⁰ Jotururu oya etako, kypynanohko õmihpyry ae ro!

¹⁷¹ Oeahmakehpyra ase, jamoreparyke oya onymeropohpyry tõ poko.

¹⁷² Õmihpyry poko eremiãko ase, zae onyripohpyry tõ exiryke.

¹⁷³ Ritonõpo, tahxime kuakorehmako, onymeropohpyry omipona jexiryke.

¹⁷⁴ Ritonõpo Jesemy, ypynanopyry poko penetãko ase, õmihpyry poko jahtao atãkyemãko ase.

¹⁷⁵ Kuewomako isene ro jahtao, oeahmatohme ya. Ah anamorepahpyry tõ jakorehmãko mã toto!

¹⁷⁶ Kaneru itatyhpyry sã toytose ywy xiaxiake rokene. Ritonõpo Jesemy, osehko jenese ropa, wenikehpyra jexiryke onyripohpyry tõ poko!