Saumu 114 - Ritonõpo Omiry: A Bíblia Sagrada na língua Aparai do Brasil

Ejitu poe Izyraeu tõ tũtatopõpyry

¹ Jako pakomotyã tutũtase ahtao Ejitu poe, Izyraeu tomo, imepỹ omiry ae oturuketõ nonory poe,

² Ritonõpo nymenekahpyryme Juta tõ toehse, ipoetoryme te, esaryme toehse Izyraeu tomo.

³ Tuna konõto Tahpiremã moro eneryke tyya toepase; tuna Joatão totypohse, ytopyra toehse.

⁴ Ypy tõ pyhseky tykase toh nexiase kaneru tõ samo, somokyhmã kõ pyhseky tykase toh nexiase kaneru poenõ samo.

⁵ Otara toehse oya, tuna konõto, mepase oty katohme? Omoro roropa tuna Joatão, oty katohme metypotyahse?

⁶ Ypy tomo, oty katohme kaneru tõ sã pyhseky mexiatose? Somokyhmãkomo, oty katohme kaneru poenõ sã pyhseky mexiatose?

⁷ Tykytyky kaxiko, nono, Kuesẽkõ oepyryhtao, Izyraeu tõ Esẽ ẽpataka,

⁸ topu konõto rĩko mana tuna enatyryme, topuimo tõ rĩko mana tuna enatyry tõme.