Saumu 113 - Ritonõpo Omiry: A Bíblia Sagrada na língua Aparai do Brasil

Ritonõpo kure ehtoh eahmary poko

¹ “Kure mase, Ritonõpo,” kahtoko! Ritonõpo Kuesẽkõ eahmatoko, ipoetory tomo!

² “Kure mase, Ritonõpo,” kakehpyra sehtone seromaroro, jũme roropa rahkene!

³ Ẽmepyry poe ikohmamyry pona ah Ritonõpo toahmasẽme nexino!

⁴ Imeimehnõ nonory põkõ emero esẽme Ritonõpo mana; tuisamehxo aexiry kapu tõ epoe mana.

⁵ Imepỹ pyra mana Ritonõpo Kuesẽkõ panono, esary kae mana kapu ao.

⁶ Yrome epuĩko mana kapu enetohme, nono roropa.

⁷ Tymõkomokãkara anỹnõko mana toto ehxirotopõpyry winoino, omise exiketõ anỹnõko mana toto etuarimatoh poe;

⁸ tuisa poenõ epeme toto rĩko mana, typoetory tõ tuisary epeme.

⁹ Nohpo, emũkuapỹ ãkyemapõko mana imehxo tytapyĩ tao, tãkye mokyro ripõko mana, imũkuru tõ ekarõko eya mana. “Kure mase, Ritonõpo,” kahtoko!