Saumu 111 - Ritonõpo Omiry: A Bíblia Sagrada na língua Aparai do Brasil

Ritonõpo eahmatopo

¹ Kure Ritonõpo mana, kahtoko! Ipoetory tõ oximõmãkõ maro Ritonõpo Kuesẽkõ eahmãko ase yjamitunuru ke porehme.

² Emese kure Ritonõpo mana inyrityã poko, osenuruhkãko ase! Morohne poko tãkye exiketõ enetuputyry sehxo mã toto.

³ Inyrihpyry emero emese kure aexiry enetupuhpõko mana, tuisamehxo aexiry roropa. Zae aexiry jũme anamonohpyra mana.

⁴ Inyrityã kurã poko onuenikehkamexipopyra Ritonõpo mana kyya xine; kypyno xine mana, kuãnohpyra xine roropa mana.

⁵ Tonahsẽ ekarõko mana tõmiry omipona exiketomo a, wenikehpyra roropa mana jũme tynetapohpyry poko kyya xine.

⁶ Ritonõpo a tyjamitunuru tonepose typoetory Izyraeu tomo a imehnõ nonory tokarose ahtao eya xine.

⁷ Anamonohpyra mana, zae roropa mana tynyriry poko emero porehme; inyripohpyry emero onytyoromara mana, naeroro torẽtyke pyra sehtone.

⁸ Jũme exikehpyra mana ajohpe pyra Ritonõpo exiryke, zae rokẽ ynororo exiryke.

⁹ Typoetory tõ tymyhpokase Ritonõpo a, tõmiry totapose roropa eya xine jũme onytyoromara ehtohme. Kure mana jamihme roropa!

¹⁰ Tuaro oexiry se awahtao, apitoryme Ritonõpo enetupuhko Oesẽme. Aomiry omipona exiketõ tuaro tyripõko mana. “Kure mase, Ritonõpo,” sykatone jũme!