Saumu 11 - Ritonõpo Omiry: A Bíblia Sagrada na língua Aparai do Brasil

Ritonõpo Kuewomanekomo

Sero saumu tymerose Tawi a.

¹ Ritonõpo Kuesẽkõ maro towomase ywy. Tuaro pyra exikety sã mase ynara karyhtao ya: “Epako torõ samo ypy tõ pona,

² popyra exiketomo a taky tõ tapoise exiryke tõtonẽtohkõ tao, typyrekõ tanỹse eya xine zae ehtoh poko exiketõ wory eraximãko mã toto.

³ Ajohpe pyra exikety kure ehtoh onyrisaromepyra mana Ritonõpo nyripohpyry, zae ehtoh roropa turumekase ahtao ahno a.”

⁴ Ritonõpo Kuesẽkõ Tytapyĩ Kurã tao mana; tuisa imehxo mana, tapõ po kapu ao. Sero nono põkõ emero enẽko mana, toto nyriry waro mana.

⁵ Tõmiry omipona exiketõ enẽko mana, popyra ehtoh poko exiketõ roropa; imehnõ osanumananõ se pyra Ritonõpo mana ipunaka.

⁶ Apoto emãko mana ẽxofere maro popyra exiketõ pona; toto wãnohnõko mana tyryrykane axitunety ke apoto samo.

⁷ Zae ehtoh rĩko Ritonõpo mana, ajohpe pyra ehtoh jamaro mana; aomiry omipona exiketõ jũme isene exĩko mã toto Ritonõpo ẽpataka.