Saumu 104 - Ritonõpo Omiry: A Bíblia Sagrada na língua Aparai do Brasil

Eremiatoh Ritonõpo eahmaryme

¹ Ritonõpo Jesemy, imehxo mase! Enekure mase tuisamehxo, saerehkatoh amuruhpõme mase;

² upo amurũko mase, saerehkatoh ke. Kapu tytywyhmase oya kamisa tywyhmary samo tapyime,

³ atapyĩ tyrise oya tuna epoe, kae kapu ao. Akurũ tõ rĩko mase akahõme, etonatoh kyryryme; tyryrykane aporiry tõ po ytõko mase.

⁴ Tyryrykane tõ rĩko mase onenyohtyãme, nenenehkane tõ õmipona exiketõme tyrĩko mase.

⁵ Sero nono tyrise oya apõ tõ po, tũpore samo, tosary winoino jũme esyryhmara exĩko mana.

⁶ Sero nono tyõtose oya tuna konõto ke, zuemũ ke zupõme samo, moro tuna tõ zueme toehse, ypy tõ emory epoe.

⁷ Yrome tuna tõ tupokase ahtao oya, toepase toh nexiase; õmiry etaryke tyya xine, tykohtase ahtao oya, tururume toytose toto.

⁸ Tuna toytose tururume ypy tõ epozakuroko, mame tyhtose jakanahmã pona tosaka xine, onyrihpyry tõ aka, toto esaryme.

⁹ Tuna ehpio tyrise oya moro ehpio onymotyẽkara tuna ehtohme, oehpyra ropa mã kehko sero nono poro, nono nerypyra ropa ehtohme.

¹⁰ Tuna enatyry rĩko mase jakanahmã tõ ao, iporiry tõ roropa ypy tõ rãnakuroko.

¹¹ Otunary poko tuna ẽnõko onokyro tõ mana; otunary jumẽtu tõ zamaro mana tutunazehnase toto ahtao.

¹² Tuna ehpio torõ tõ tymỹkõ rĩko mã toto, eremiãko mã toto wewe amoriry tõ poe.

¹³ Kapu poe konopo enehpõko mase ypy tõ pona, onyrityã kurã nono zamaro mana.

¹⁴ Onahpoty ahtanohpõko mase pui tõ napyryme, tykyrysã roropa, tiriiku tõkehko ahtanohpõko mase ahno napyryme, morohne arykatohme kyya xine tonahsãme.

¹⁵ Nono poe uwa eukuru ripõko mase ahno a sekese toto ehtohme; azeite roropa tãkye toto ehtohme, wyi roropa jamihme toto ehtohme.

¹⁶ Konopo itamurume oehnõko wewe tõ pona, Ritonõpo Kuesẽkõ kyryry apupari tõ pona, inarykatyã pona ypy tõ Ripano po.

¹⁷ Moroto torõ tõ tymỹkõ rĩko mã toto, sekonia tõ tymỹkõ rĩko mã toto wewe pinieiro tõ po.

¹⁸ Poti tõ itu htaõ tosarykõ menekãko mã toto kae ypy tõ po, onokyro tõ otonẽnõko mã toto topuimo tõ rãnao.

¹⁹ Nuno tyrise oya nuno tõ kuhtohme; xixi tuaro mana tyomõtoh toehse ahtao.

²⁰ Koko tyrise oya, imeimehnõ onokyro tõ tũtãko mã toto tykohmãse ahtao.

²¹ Reão tõ wãtara ro exiketõ panaikato kuime urakanãko mã toto, Ritonõpo nekarory zupiryhtao tyya xine tohkõme.

²² Yrome xixi tũtaryhtao ytõko ropa mã toto kohrame ehtohme tosaka xine.

²³ Mame ahno ytõko mã toto erohse, toerokurukõ poko kohmãnõko mã toto.

²⁴ Ritonõpo, onyrityã tuhke rokẽ rahkene, tuaro oehtoh ke morohne tyrise oya. Sero nono pehme mana onyrityã ke.

²⁵ Moroto mã tuna konõto, zumohxo mana tukuaõke, onokyro inunomo, pisarara exiketõ roropa, tuhke mã toto, ekuhpỹme.

²⁶ Tuna konõto poro wapu tõ ytõko, zue ao Rewiatã osemeikãko mana, onokyroimo nakuaono onyrihpyryme toexiryke.

²⁷ Mokaro emero oeraximãko mã toto, tonahsẽ eraximãko onekarory eya xine inapyrykõme omise toehse toto ahtao.

²⁸ Toto napyry ekarõko mase, otuhnõko mã toto, tuesapare exĩko.

²⁹ Toto winoino oeramaryhtao oserehnõko mã toto; toto oserematoh tupuxihkase ropa oya ahtao orihnõko mã toto, nonome exĩko ropa nono risẽme toexirykõke.

³⁰ Yrome, oserematoh ekaroryhtao oya enurũko mã toto; moro saaro isene exiketõ ekarõko mase sero nono põkomo a.

³¹ Ah Ritonõpo Kuesẽkõ saeremehxo ehtoh jũme exikehpyra nexino! Ah tãkye nexino tynyrityã poko!

³² Sero nono eneryhtao Ritonõpo a tykytyky ãko mana; ypy tõ aporyhtao eya orexĩto tũtãko mana.

³³ Eremiãko ase Ritonõpo eahmaryme isene ro jahtao; eremiãko ase Ritonõpo netaryme jorihtoh ponãmero.

³⁴ Ritonõpo zamaro se ase jeremiatoh tonõ ke, ipoe tãkye jexiryke.

³⁵ Ah enahketyme nexĩ toto mokaro Ritonõpo enetuputyry se pyra exiketomo, ah popyra exiketõ tonahkasẽme nexĩ toto! Yjamitunuru ke porehme oeahmary se ase, Ritonõpo Jesemy! Kure mase, Ritonõpo!