Saumu 103 - Ritonõpo Omiry: A Bíblia Sagrada na língua Aparai do Brasil

Kypyno xine Ritonõpo ehtoh poko

Tawi nymerohpyry.

¹ Ritonõpo Jesemy, kure mase ipunaka! Ukurohtao oeahmãko ase yjamitunuru ke porehme!

² Oeahmãko ase, Ritonõpo, yjamitunuru ke, onyrityã kurã poko ya wenikehpyra ase!

³ Yyrypyry tõ korokãko mana emero, kure pyra jehtoh kurãkãko roropa mana;

⁴ ypynanohnõko mana orihpyra jehtohme, kure rokẽ jyrĩko mana ypyno toexiryke, juãnohpyra roropa mana.

⁵ Inyriry ya yzamaro mana kure rokẽ exiryke, jamihme jyrĩko ropa mana nuasemã sã jehtohme, piano sã jehtohme.

⁶ Zae rokẽ kuapiakatorỹko Ritonõpo mana, irohmanohpotyã akorehmãko mana, toto ewomãko mana.

⁷ Tyriry se toehtoh tonepose Moeze a, tõsenetupuhtoh tonõ roropa; tynyrityã tyjamitunuru ke tonepose Izyraeu tomo a.

⁸ Ritonõpo kure mana, kuãnopyrykõ se pyra mana, kure kyrirykõ se mana, axĩ pyra zekĩtapanõko mana kypyno xine toexiryke.

⁹ Axĩtao rokẽ kupokatorỹko mana, jũme pyra kyzehno xine exĩko mana.

¹⁰ Kuãnohpyra xine Ritonõpo mana kynyrirykõ emetakame, kyyrypyrykõ onepehmara mana popyra kuehtohkõ ke, epehpyryme.

¹¹ Kapu kae exiry sã sero nono epoe, moro sã mã kypyno xine Ritonõpo ehtopo, tõmiry omipona se exiketomo a.

¹² Moe xixi tũtatoh wino mana xixi omõtoh poe, moro moe ehtoh sã kywinoino xine kyyrypyrykõ apiakãko Ritonõpo mana.

¹³ Poetohti tõ zũ typoenõ pyno ehtoh sã kypyno xine Kuesẽkõ mana, aomipona se exiketomo.

¹⁴ Ynara exiryke, kynyrihpyrykõ waro mana; nonome kuehtohkõ poko wenikehpyra mã ynororo.

¹⁵ Isene kuehtohkõ onahpoty sã mana; ahtãko mana ekutãko roropa mana ona po.

¹⁶ Mame tyryrykane tyryry ãko mana. Moro ekuru tonahsẽme exĩko; jũme osenepyra ropa exĩko mana.

¹⁷ Yrome kypyno xine Ritonõpo Kuesẽkõ ehtoh jũme mana, tosẽkõme enetupuhnanomo a, kure toehtoh enepõko mana kypoenõkõ poenomo a,

¹⁸ tynetapohpyry poko ỹme exiketomo a, inyripohpyry omipona anamonohpyra exiketomo a.

¹⁹ Ritonõpo Kuesẽkomo a tuisamehxo toehtoh apõ tyrise tosao kapu ao; tuisa konõtome mana, emero esẽme rahkene.

²⁰ Ritonõpo eahmatoko, inenyohtyã jamihme exiketomo, orẽpyra exiketomo, aomiry etananomo, inyripohpyry omipona exiketomo!

²¹ Kuesẽkõ eahmatoko inenyohtyã emero kapuaõkomo, ipoetory tõ emero, tyriry se Ritonõpo ehtoh omipona exiketomo!

²² Ritonõpo eahmatoko inyrityã emero, emero osa po, tuisame ynororo ehtoh po. Oeahmãko ase, Ritonõpo Jesemy, yjamitunuru ke porehme!