Saumu 101 - Ritonõpo Omiry: A Bíblia Sagrada na língua Aparai do Brasil

Tawi omihpyry

Tawi nymerohpyry.

¹ Eremiãko ase anamonohpyra oehtoh poko, zae oehtoh poko roropa; eremiãko ase oeahmaryme, Ritonõpo Jesemy.

² Zae ehtoh poko rokẽ exĩko ase. Otara ahtao oehnõko mah osẽpatakãmase ymaro? Kure ehtoh poko rokẽ exĩko ase ytapyĩ tao,

³ moro taka popyra ehtoh onẽmapopyra ase ipunaka. Ritonõpo rumekary se exiketõ nyriry se pyra ase yronymyryme, mokaro rypyry poko se pyra roropa ase.

⁴ Osenetupuhtoh ajohpe ehtoh ameke aropõko ase ywinoino. Popyra ehtoh poko pyra exĩko ase ipunaka.

⁵ Tokare pyra tykatonomory kerekeremananõ enahkapõko ase, imehnõ motye kure osekaroketomo te, epyrypaketõ se pyra ase ipunaka.

⁶ Anamonohpyra exiketõ Ritonõpo omipona toexiry poko se rokẽ ase. Osa ekarõko ase eya xine ytapyĩ konõto tao. Zae ehtoh poko exiketomo a, erohtoh ekarõko ase.

⁷ Imehnõ enekunohne tosake pyra exĩko mana ytapyĩ konõto tao. Ajohpe exiketõ se pyra ase upũto roropa.

⁸ Kokoro rokẽ popyra exiketõ enahkapõko ase kynonorykõ po, zae pyra ehtoh poko exiketõ aropõko ase Ritonõpo patary poe.