Saumu 10 - Ritonõpo Omiry: A Bíblia Sagrada na língua Aparai do Brasil

Zae ehtoh tyripõko Ritonõpo a

¹ Ritonõpo yna Esemy, oty katoh ameke mahno ya? Oty katohme otonẽnõko mah jetuarimaryhtao?

² Popyra exiketõ epyrypãko mã toto, tymõkomokãkara tuarimapõko mã toto. Apoiko toto, Ritonõpo, ahno apoitoh aka, inyrihpyrykõ aka.

³ Popyra ehtoh poko exiketõ epyrypãko mã toto typenetatohkõ poko. Tyamene se exiketõ imehnõ ryhmãko mã toto, popyra ehtoh tyripõko mã toto Ritonõpo a, tosẽkõme Ritonõpo onenetupuhpyra mã toto.

⁴ Popyra exiketõ Ritonõpo onupipyra mã toto; toepyrypatohkõke oty kara mã toto Ritonõpo poko.

⁵ Emero rokẽ poko mokyro ahtao typenetatoh apoĩko mana. Onenetupuhsaromepyra mana Ritonõpo napiakary poko, topetõkara poihtõko roropa mana.

⁶ Ynara osenetupuhnõko mokyro mana: Orẽpyra exikehpyra ase; jũme etuarimara exĩko ase.

⁷ Oturukehpyra mana popyra ehtoh enehpory poko te, omi ajohpanory ke, imehnõ enaroximary poko. Imehnõ hxirõko roropa mana, popyra toto ehtoh poko oturukehpyra mana.

⁸ Otonẽnõko mokyro mana pata tõ rãnao; ahno kurã eraximãko moroto mana etapatohme, towomaneke pyra exiketõ zupĩko mana toto apoitohme.

⁹ Eraximãko mana tõtonẽtoh tao, reão samo, imehnõ enẽko mana, osewomasaromepyra exiketomo. Tãto tao eraximãko mana urakanakety samo, tykarimory apoĩko mana apoitoh tao, tymõkomoke pyra exikety, iiryhmatohme.

¹⁰ Totapase toto, epukãko toto; typoremãkase jamihme exikety a.

¹¹ Mokyro popyra exikety ynara ãko mana tyya rokene: “Ritonõpo ‘Oty’ kara mana. Pimỹme rokẽ mana, osenuhmara mana!”

¹² Osehko, Ritonõpo yna Esemy, mokaro popyra exiketõ zuãnohko! Wenikehpyra exiko aosanumatyã poko!

¹³ Ritonõpo onypoihtosaromepyra popyra exiketõ mana, eunopyryhtao eya xine: “Juãnohpyra Ritonõpo mana,” ãko osenetupuhnõko mã toh repe.

¹⁴ Yrome omoro, Ritonõpo, osenuhmãko mase, imehnõ osanumary enẽko mase, emynyhmaketõ akorehmary se mase toto atasamaryhtao ro. Osewomasaromepyra exiketõ oeraximãko mã toto. Etuarimaketõ anakorehmakehpyra mase.

¹⁵ Ritonõpo, popyra exiketõ jamitunuru enahkapoko, zae pyra exiketomo. Toto zuãnohko inyrityãkõ popỹ epehpyryme, zae pyra toehtohkõ poko pyra ropa toto ehtohme.

¹⁶ Ritonõpo tuisame mase jũme; imehnõ tyneponãmarykõ eahmananõ osenahkãko mã toto ononory po.

¹⁷ Ritonõpo yna Esemy, taosanumase exiketõ otururu oya etãko mase, orẽpyra toto rĩko mase.

¹⁸ Iiryhmatyã kohtary etãko mase, tumyke pyra exiketõ roropa; zae apiakãko mase toto akorehmaryme, toto onyryhmara ropa ahno tõ ehtohme.