Numeru 2 - Ritonõpo Omiry: A Bíblia Sagrada na língua Aparai do Brasil

Oxiekyrymãkõ esary poko osesariryhtao

¹ Ynara tykase Ritonõpo Moeze a Arão maro:

² — Osesariryhtao Izyraeu tomo a tykamisã, pãteira pũto exĩko mã toto, oxiekyrymãkõ maro, tyekyry tõ kamisã pãteira pũto. Osesarĩko mã toto Ymaro Oturutoh Kurã zomye, atameke pohto ehtohme.

^3-8 — Xixi tũtatoh wino mokaro Juta tõ maro exiketõ tosarykõ rĩko mã toto oximaro, tyekyry tõ maro, Juta tõ kamisã, pãteira pũto. Ynara mã toto tutuisarykõ maro soutatu tõ maro: Juta tõ soutatu tomo: 74.600 mãkomo, tuisa Nasõ maro, Aminatape mũkuru. Isakaa tõ soutatu tomo: 54.400 mãkomo, tuisa Netaneu maro, Zuaa mũkuru. Zepurõ tõ soutatu tomo: 57.400 mãkomo, tuisa Eriape maro, Herõ mũkuru.

⁹ — Juta tõ maro ytoketõ atapona 186.400me ytoytõko osemazuhme.

^10-15 — Ikurenae ytoytoketõ Rupẽ tõ tykamisã, pãteira maro. Ynara mã toto tutuisarykõ maro, soutatu tõ maro: Rupẽ tõ soutatu tomo: 46.500 mãkomo, tuisa Erisua maro, Seteua mũkuru. Ximeão tõ soutatu tomo: 59.300 mãkomo, tuisa Serumieu maro, Zurisatai mũkuru. Kate tõ soutatu tomo: 45.650 mãkomo, tuisa Eriasape maro, Teueu mũkuru.

¹⁶ — Rupẽ tõ maro ytoketõ atapona 151.450me ytoytõko okomino, Juta tõ mykapo.

¹⁷ — Mame mokaro asakoro oximõmãkõ mykapo Ymaro Oturutoh arõko rewita tõ mana. Oximaro ytõko mã toto atakenaka toehtopõpyrykõ sã totypohse toto ahtao osesarise tykamisã, pãteira pũto.

^18-23 — Xixi omõtoh wino ytoytoketõ Eparaĩ tõ tykamisã, pãteira maro ynara mã toto tutuisarykõ maro soutatu tõ maro: Eparaĩ tõ soutatu tomo: 40.500 mãkomo, tuisa Erisama maro, Amiute mũkuru. Manase tõ soutatu tomo: 32.200 mãkomo, tuisa Kamarieu maro, Petasua mũkuru. Pẽjamĩ tõ soutatu tomo: 35.400 mãkomo, tuisa Apitã maro, Kiteoni mũkuru.

²⁴ — Eparaĩ tõ maro ytoketõ atapona 108.100me ytoytõko oximõmãkõ oseruaome samo rewita tõ mykapo.

^25-30 — Inikahpoẽkõ ytoytoketõ Tã tõ tykamisã, pãteira maro ynara mã toto tutuisarykõ maro soutatu tõ maro: Tã tõ soutatu tomo: 62.700 mãkomo, tuisa Aiezea maro, Amisatai mũkuru. Asea tõ soutatu tomo: 41.500 mãkomo, tuisa Pajieu maro, Okarã mũkuru. Napatari tõ soutatu tomo: 53.400 mãkomo, tuisa Aira maro, Enã mũkuru.

³¹ — Tã tõ maro ytoketõ atapona 157.600me toh nexiase. Etyhpyryme ytoytõko toh nexiase.

³² Atapona Izyraeu tõ esetykõ tymerose soutatu tõme: 603.550me nexiase.

³³ Ritonõpo omi poe Moeze a rewita tõ onukuhpyra toh nexiase imehnõ Izyraeu tõ maro.

³⁴ Moro saaro Ritonõpo nyripohpyry Moeze a, moro tyrise Izyraeu tomo a emero. Tõsesarise toh nexiase tyekyry tõ maro tykamisã, pãteira pũto. Mame toytoytose toto oximõme tyekyry tõ maro.