Numeru 1 - Ritonõpo Omiry: A Bíblia Sagrada na língua Aparai do Brasil

Ahno tuhke ehtoh kuhtopõpyry apitorymano

¹ Mame jeimamyry asakoro taropose ahtao, Izyraeu tõ esyryhmatopõpyry poe Ejitu poe, nuno asakoro aehtoh po, ẽmepyry apitorymano, Ritonõpo tõturuse Moeze a ona Xinai po, tapyi pitiko Tymaro oturutoh tao. Ynara tykase ynororo:

² — Arão maro Izyraeu tõ ikuhtoko, oxiekyrymãkomo, itapyĩ taõkomo, enara.

³ Orutua kõ esety imerotoko 20me jeimamyry nae exiketomo, emero tuãtase exiketomo, soutatume exiketomo.

⁴ Tamuxime exiketõ imenekako, toiro tuisame exikety toiro oxiekyrymãkõ wino ãkorehmatohkõme.

^5-16 Ynara mã toto orutua komo, tyekyrykõ tuisaryme exiketomo, ãkorehmatohkõme: Rupẽ tõ tuisary Erisua, Seteua mũkuru. Ximeão tõ tuisary Serumieu, Zurisatai mũkuru. Juta tõ tuisary Nasõ, Aminatape mũkuru. Isakaa tõ tuisary Netaneu, Zuaa mũkuru. Zepurõ tõ tuisary Eriape, Herõ mũkuru. Eparaĩ tõ tuisary Erisama, Amiute mũkuru. Manase tõ tuisary Kamarieu, Petasua mũkuru. Pẽjamĩ tõ tuisary Apitã, Kiteoni mũkuru. Tã tõ tuisary Aiezea, Amisatai mũkuru. Asea tõ tuisary Pajieu, Okarã mũkuru. Kate tõ tuisary Eriasape, Teueu mũkuru. Napatari tõ tuisary Aira, Enã mũkuru. Mokaro tymenekase tuisame toto ehtohme tyekyry tõ akorehmaneme toto ehtohme Izyraeu tõ rãnao.

^17-18 Naeroro nuno asakoromã po, ẽmepyry apitorymã po Moeze a Arão maro mokaro 12mãkõ maro, ahno imoihmãkõ taoximõnohpose toto, toto kuhtohme, oxiekyrymãkõ oximõme, tapyi taõkõ oximõme, orutua kõ, 20me jeimamyry nae exiketõ esetykõ merotohme.

¹⁹ Moro sã tukuhse toh nexiase ona Xinai po, Ritonõpo omi poe Moeze a.

^20-43 Orutua kõ 20me jeimamyry nae exiketõ, soutatume exiketõ esetykõ tymerose oximaro tyekyry tõ maro. Osemazuhme Rupẽ tõ, Jako mũkuru apitorymã tymerose. Atapona toto ehtoh tymerose: Rupẽ tomo, 46.500. Ximeão tomo, 59.300. Kate tomo, 45.650. Juta tomo, 74.600. Isakaa tomo, 54.400. Zepurõ tomo, 57.400. Eparaĩ tomo, 40.500. Manase tomo, 32.200. Pẽjamĩ tomo, 35.400. Tã tomo, 62.700. Asea tomo, 41.500. Napatari tomo, 53.400.

^44-46 Orutua kõ 20me jeimamyry nae exiketõ, soutatume exiketõ 603.550me nexiase.

Rewita tomo

⁴⁷ Yrome rewita tõ esetykõ onymeropyra toh nexiase imehnõ oxiekyry tõ maro.

⁴⁸ Ynara tykase Ritonõpo exiryke Moeze a:

⁴⁹ — Orutua kõ tuãtase exiketõ, soutatume exiketõ kukuruhtao oya, rewita tõ onukuhpyra exiko.

⁵⁰ Yrome rewita tõ tyripoko Ytapyĩ Kurã kurãkananõme, imõkomory maro. Morohne aronanõme toto tyripoko, ipoko toto erohtohme Tapyi zomye toto osesaritohme.

⁵¹ Ytotoh toehse ahtao rewita tõ ymaro oturutoh kararahnõko mã toto. Toeporehkase awahtao xine osesaritoh pona Ytapyĩ amõko ropa rewita tõ mana imehnõ oehpyra ehtohme Ytapyĩ Kurã pũtokoxi aorikyrykõino.

⁵² Imehnõ Izyraeu tõ tehme exĩko mã toto tosarykõ po, kamisã risẽ pãteira pũto tyekyry tõ maro.

⁵³ Yrome rewita tõ osesarĩko mã toto ymaro oturutoh zomye eraseme, imehnõ rewita tõ kara oehpyra ehtohme moro pũtokoxi Izyraeu tõ zehno jexiryino.

⁵⁴ Moro tyrise Izyraeu tomo a emero Ritonõpo nyripohpyry ae ro Moeze a.