Kãtiku 1 - Ritonõpo Omiry: A Bíblia Sagrada na língua Aparai do Brasil

¹ Sero nase Saromão eremiatoh imehxo exikety, imehnõ eremiatoh motye kurehxo exiketyme nase.

Eremiatoh osemazupu Nohpo omiryme

² Ah ypohno typotapihpyryke! Ypyno oehtoh uwa eukuru jehnahpyry motye kure mana.

³ Typoxine mase; oesety etaryhtao ya moro typoxine oehtoh oehnõko ropa ya mana, josenetupuhtoh aka. Nohpo tõ emero, opyno exikehsaromepyra mã toto.

⁴ Kuaroko amaro! Eropa axiny! Ytuisaryme exiko, mame kuaroko onyhtoh taka. Tuisa konõto, atãkyemãko ynanase opokoino, eremiãko ynanase opoko, opyty pyno oexiry poko, amaro ehtoh kure mana yna a, eukuru jehnahpyry motye. Naeroro, tuisa, emero opyno ynanase.

Imoihmãkomo Nohpo

⁵ Nohpo tomo, Jerusarẽ põkomo, xinukutumehme sã ypihpyry nase. Yrome oryxime ase. Xinukutumehme sã ywy, tapyi tõ sã ona tonorẽ po, kamisa tyhwyme exikety samo Saromão tapyĩ konõto tao.

⁶ Jenepyra ehtoko xinukutumehme sã jexiryke, tyahkase jexiryke xixi a. Ypiry tõ yzehno toexiryke yrohmanohpoase toto uwa zoko tõ poko. Morara exiryke osepyno exisaromepyra exiase.

⁷ Kaxiko ya, pihpi, otoko oeky tõ nahpãko mah, kaneru tomo? Otoko na toto arõko mah toto oserematohme tãxiahtao? Kuuruko ytoytopyra jehtohme oupiry poko imehnõ eky tõ rãnakuroko.

Orutua

⁸ Zuaro pyra awahtao, kuku, imehnõ nohpo tõ motye oryximehxo mase, imehnõ eky tõ ekahmako onahpoty enetohme oeky tõ poti tõ nahpatohme, toky tõ pyno exiketõ tapyĩ tõ pũto.

⁹ Enekure potu mase, kuku, kawaru tõ samo, Parao kahu aronanõ samo.

¹⁰ Oẽmyty enekure mana, oũsety maro, panasere maro. Opymyry kure potu mana osenao maro, uuru risemy!

¹¹ Osenao rĩko sytase okyryryme, uuru risẽ parata maro emeporyme.

Nohpo

¹² Ytuisary kohrame toehse ahtao upũtokoxi, typorohtoh po, ixtaratu typoxine exikety ke osa pehkãko nexiase.

¹³ Mokyro ypyno exikety typoxine mira sã mana, aoseremaryhtao ymanatyry tõ po.

¹⁴ Ypyno exikety otyro ekuru sã mana ona po, uwa tõ esao roropa Keti po.

Orutua

¹⁵ Oryxime mase, kuku, opyno ase ipunaka! Oryximehxo mase! Utuku enuru sã oenuru mana, zemime mana.

Nohpo

¹⁶ Nuaseme mase, pihpi, opyno ase yronymyryme. Yzamaro mase ipunaka! Onahpoty potu kynyhtohme exĩko mana.

¹⁷ Apupari moro kytapyĩ weweme exĩko mana, pinieiro tõ kytapyĩ amotohme exĩko mana.