Izaja 12 - Ritonõpo Omiry: A Bíblia Sagrada na língua Aparai do Brasil

Eremiatoh Ritonõpo eahmatohme

¹ Moro ẽmepyry toehse ahtao ynara ãko matose, eremiãko: “Ritonõpo, oeahmãko ase! Yzehno mexiase repe, yrome yzehno pyra mexi ropa. Seromaroro jemynyhmatoh enahkãko mase.

² Ypynanohneme Ritonõpo mana; enetupuhnõko ase, mame enaromyra ase exĩko. Yjamihtanohnõko Ritonõpo mana, orẽpyra jehtohme. Ypynanohneme mã ynororo.

³ Tuna anymyry poko exiketõ samo, tutunazehnase ahtao. Moro saaro atãkyemãko matose typynanohse eya oexirykõ poko.”

⁴ Morarame moro ẽmepyryme toehse ahtao ynara ãko matose, eremiãko: “Ritonõpo eahmatoko! Ikohmatoko, ãkorehmapotohkõme eya. Imehnõ nonory põkõ emero zurutoko inyrityã kurã poko; imehxo aexiry poko toto zurutoko.

⁵ Eremiatoko Ritonõpo eahmaryme inyrityã kurã pokoino, morohne waro emero nonory põkõ ehtohme!

⁶ Xião põkomo, atãkyematoko, Ritonõpo eahmatoko roropa. Ritonõpo kurano, Jamihmehxo Exikety, Izyraeu tõ Esemy moroto mana typoetory tõ maro osesarĩko mana.”