Ezekieu 15 - Ritonõpo Omiry: A Bíblia Sagrada na língua Aparai do Brasil

Uwa zoko popyra ehtoh poko

¹ Mame Ritonõpo tõturuse ya. Ynara tykase:

² — Ahno mũkuru, otyme kure uwa zoko nae? Weweme itu htaõ motye kure nae?

³ Arypyra, uwa zoko ke okyryry anaxikara mase. Otytyko tyhwymatohme onyripyra roropa mase apuru pokona.

⁴ Apotopokõme rokẽ kure mana. Mame etyhpyry tõ tyahse ahtao irãnao roropa, otyme kure exĩko nae?

⁵ Arypyra ipunaka! Onyahpyra ro ahtao popyra nexiase, mame tyahse ahtao morara motye, popyra rokẽ mã ipunaka.

⁶ Ynara ãko Ritonõpo mana: — Uwa zoko apoiry sã itu htao jahkatohme, moro sã Jerusarẽ põkõ apoĩko ase.

⁷ Toto wãnohnõko ase. Toepase toto apotoh takuroko, yrome seromaroro toto enahkãko apoto mana. Mokaro wãnopyryhtao ya zuaro exĩko matose, ywy ase Ritonõpo.

⁸ Turumekase ywy eya xine, morara exiryke toto nonory ripõko ase patãpome, oname tonorẽ toehse roropa. Ywy, Ritonõpo Oesẽkomo, oturuno.