DALEK TERABA NON JISAS KRAES MAK TEULU 6 - Gospels of Mark and John in Apma

Tarut at Nasaret rat varik negita Jisas an

¹ Jisas malngi ut iginan bi mul bamul li vininan mini non tarutni.

² Tei le ren ah Sabat bi bawo mwesesesrak le valin tangroan. Tarutmumu ratti iginan, entorah rat rongo ba rat tetkotkoh tokol ini. Ram uhleli nuhu, “Ani aji ahe teli bwera ililngian ahe ibeh? Ililngian apma si i teskak mini ah? Gavak nagoah mweleli karetan niah tam gita?

³ Tebaite enang ngahe niah bibi ajinan lelnan val niah dajin ah Meri, bi kisan ah Jemes bi Joses bi Judas bi Saemon? Hojinni ramdi bede?” Ratvep tapmak bi rabawo nembep i vepajian.

⁴ Jisas bep mini ni nuhu, “Ajinan dalen God ba vihni meresnan modok livini seranae ba mwegamui livinan ba vihni meresnan mabulong mini ni.”

⁵ Tebam lelte karetan nga iginan, ba telngi ngan li datngin goah rat ras, bi bamwesa ni.

⁶ Tetkoh tokol i goah vihni mwetakngaan non at iginan ba tei tebulong. Jisas tevan seranae ban li vinini ah iginan, bi mwesesra tarutni.

Jisas teso botwot i non tarutni niah ni tesangwul vepnan karu

⁷ Mahu non tarutni ah ni tesangwul vepnan karu vautbwaleh bi moso gakaruak i ni. Maskani rowok tegol mini ni, metan goah rabat koro loah.

⁸ Maskani dalekte mini ni bep nuhu, “Tigoah kan ban ba kan ba wuhte apmaan u nomi huralan, kan gavin katokami nante. Kan ba wuhte maromian, io kan ba wuhte watangan, kan ba wuhte manean le nomi watang.

⁹ Kan goro bwelan wokommi, ba kan ba kote bwelakte wakaruan.

¹⁰ Entorah kan ban li vini ba tigoah tarutnan vini nanong ran lep gogo gimi, ba kan dok naben goni nanong mulngan ah kan nemlu dini ut nanong.

¹¹ Ba tigoah kan ban li vini go ba tarutnan vini nanong ranba lep gogo gimi nga, io ran ba rongtani gimi nga ba kan nelngi vini nanong. Kan dahli tankin vini nanong bahka wokomi lemta metan goah manei kasesrana.”

¹² Raban bi ram doptop, metan goah tarutni rabat wukak dini no kapmwaan.

¹³ Rat koro loah dini goah loah tedi le ni bi ram salila sileng sangbak li goah rat ras, bi rabamwesa ni.

Metenan Jon Baptaes

¹⁴ Nanong ba Herod subu non at Galilini, terongo vepnan Jisas. Gonani vepnan Jisas tekoro ut. Datngin tarutni rabep nuhu, “Nabih nuhu Jon Baptaes nong, temas bamul dini mete, gonani rowok tegol ahe maskak mini.”

¹⁵ Ba datngin rabep nuhu, “Ni Elaeja.” Ba datngin rabep nuhu, “Ni ajinan dalen God, tapmak goah rattok mate.”

¹⁶ Entorah Herod terongo bi bep nuhu, “Ni Jon Baptaes, niah nat leli ba ram dasrotvi kawan. Nanong ba temas bamul dini mete.”

¹⁷ Tei Herod nanong niah teleli ba rat wuhu Jon, bi mweleli ram malngi le valin illan. Herod teleli tapmak gonani Herodias niah tei atleiman kisan ah Pilip ba Herod telak ini.

¹⁸ Bi Jon ba tevalenga radaini dobo mini nuhu, “Teba woswos tenga nagoah kon lak bamul i atleiman kisam tedapmak.”

¹⁹ Lelen Herodias tekakat i Jon, ba batba hi nga gonani temtani Herod.

²⁰ Gonani goi Herod bi temtani Jon, teililngi goah Jon tei ni aji woswosan, bi tei aji sangbak. Tei bujun nanong nagoah batba hi nga. Tedoni bamte goah terongtani Jon, ba nannga ba teba ililngite mwatwen toptowan nga non Jon.

²¹ Tevan ngama ba Herodias butdihi hal tewoswos. Herod teleli bwera sasabisian u rennan non woran ah terop bwiswis. Mweleli kanleutan bi muuh sasabisi i goah rat tei walun bongon aji kawunan vini, bi goah ratei salenan bwalan, bi goah rattei lemtan tarutni at Galili.

²² Nujun Herodias niah dalat mapma bi bwel. Non welan teleli ba rongnan nokon Herod, bi goah rat sasabisi u non kanleutan ba rongnan noko tei tekabis tokol ini.

²³ Herod bep mini aji dalat nong nuhu, “Nambwatle ini mini kik, nuhu nan neskani apma nannga ah kon uhleli i nana. Masen ah manei ngudun nok leut.”

²⁴ Aji dalat nong ban ben dajin, bi muhleli ini nuhu, “Nan uhleli apma ini?” Dajin bep mini nuhu, “Kon uhleli bujun Jon Baptaes.”

²⁵ Aji dalat nong mul ben subu nong bi bep mini nuhu, “Namdoni nuhu, koskani bujun Jon Baptaes na mini nana nong le belet.”

²⁶ Vehuran nong teleli ba rongnan nokon subu tekapma tokol ini, ba batbam bep tebu nga mini, gonani tewatle masi ini lemtan goah rat sasabisi.

²⁷ Masro goah rat sesep ban nuhu rama van neli bujun Jon mapma. Ajinan sesepan ni nong raban le valin illan, bi ram das rotvi bujun Jon,

²⁸ bi ramali mapma le belet, bi ramaskani mini aji dalat nong. Bi ban maskani mini dajin.

²⁹ Entorah tarut non Jon rat rongo goah Jon temat, bi ram mapma neselkani mamjin bi raban nedipmi.

Jisas tevangi tarut tevata vakalim

³⁰ Atnan kasosoni niah Jisas tesroni, ramulma vaben Jisas, bi ram mwatwo halan leutni mini, niah rat leli bi rat vep.

³¹ Leto nanong ba tarutni halkawu lengleng ah rat tepma bi raban, rat leli ba taron go tei tebulong ah Jisas mini non tarutni rabat kanleut. Bi utnen go tei tebulong ah rabat lelte apma. Bep mini ni nuhu, “Taban tesi ibe ut ah manei kidi ma, metan goah kan membe.”

³² Ramamlu li aga, tegamui ni ma, raban ut ah tei ut tedi ronga.

³³ Entorah rat sip li aga, ba tarutni rat kita goah rat temlu, bi ramaililngi nuhu tei ni. Rat teililngi luhmwi ut ah ratvan iginan, ram hural al ut bi ramdok nemban bawo ut ah Jisas mini non tarutni rabat van iginan.

³⁴ Entorah Jisas tesak ut ba mwigita bwera tarutmumu ah ratti. Bware tedok nokon Jisas gonani ratti tekeni sipsip ah ajinan kitan li ni mabulong. Mwesak be bi bawo mwesesra ni i apma halkawu lengleng.

³⁵ Tei sasari utebwarek ba tarut non Jisas ramapma bi rabep mini Jisas nuhu, “Utbwarek nanong, bi ut i tamdi iginan ahe ba vini tebu.

³⁶ Kosro tarutni rahe mul, metan go ran ban negelte apma ah ran gani li vini ni rahe.”

³⁷ Jisas balu ini nuhu, “Karuskakte hinak mini ni ba rama kani.” Rabep mini nuhu, “Kom doni nuhu kama van negelte bered i dola tewudelu vakaru, bi nebangi ni?”

³⁸ Jisas muhleli i ni nuhu, “Kami bered tekeni apma? Karuban negita.” Entorah rat wutdihi mulngan, bi ram mapma nembep mini nuhu, “Bered bol kalim bi ik bwera karu.”

³⁹ Jisas bep mini non tarutni nuhu, rama leli ba tarutni rama sadok mapma ut teses, le ruvilih.

⁴⁰ Tarutni nong ram sadok beverak, ni ngawul kakalimak, bi utgo tei tewudelu.

⁴¹ Jisas mali bered ah bol kalim, bi ik ah bwera karu, bi mwigit vamere le bini bavatla God uru. Bwabwerawera bi maskani mini non tarutni nuhu rama vahtani mapma mini tarutni. Bahtani ik niah bwera karu mapma mase.

⁴² Nisera rat kani, bi tei rat kubu sera.

⁴³ Non tarutni ram songi watang tesangwul vepnan keru i riaknan hinak ah rat kanmis ini.

⁴⁴ Mulngan dalmani niah rat kani bered nong, ba tei ni tevata vakalim.

Jisas tehural li teh

⁴⁵ Tei vilbwaleh, ba Jisas mweleli non tarutni ram sip li aga, bi ram dok nemban bawo ut ah rat tehu i Betsaeda, almaun teh. Limalen goah ratemlu ba Jisas mosobotwot i tarutni.

⁴⁶ Tei limalen goah telngi non tarutni, bi mwesak li rep nuhu nema dangro.

⁴⁷ Tei utebwarek, ba aga i non tarutni rat van ling nong ba tetpo rado ngama loloknan teh. Jisas tedi rada ngama ut.

⁴⁸ Tekita goah non tarutni ba ratti le illan, tokol, rat vilis dopmi ba tebu, gonani rowon leng tei tetkol basla. Tei alibe le masen to kajil bi to telapaleh ba muhural mapma bee li teh.

⁴⁹ Entorah rat kita goah tehural mapma bee li teh ba ratgam bihni nuhu tei ni loah, bi ram ngaa.

⁵⁰ Gonani entorah rat kita, ba rat temtaji tokol. Jisas modoptop mini ni bep nuhu, “Rongnan nokomi nemba kapmaan, kan bamtajian gonani nana nge.”

⁵¹ Mwegala vali aga bi mwesak bee, tei vilbwaleh ba leng mut. Non tarutni rat temtaji bi rat tetkoh but ini.

⁵² Rat baililngite mwatwen bered, nga gonani buju tei tetkol basla.

Jisas tevamwesa goah rat ras li vini ah Genesaret

⁵³ Rat van rotvi teh bi ram mapma li vini ah Genesaret, ut ah rat woji bata aga iginan.

⁵⁴ Entorah rat vaut dini aga, bi ram sak ut, entorah rat sak ba tarutni rat gitdihi Jisas vilbwaleh.

⁵⁵ Bi ram rop ban li vinini ah iginan, bi ram apko goah rat ras mapma li kabwali ben Jisas ut ah rat rongo ut ah tedi iginan.

⁵⁶ Ut ibenan ah Jisas tevan iginan, li biribiri vinini, bi li vinini ah kawu, bi mapma lekona. Ba tarutni rat apko goah rat ras mapma ut ah ti utnen maket, bi ram uhleli ini nuhu nema leli ba rasanni rama dibwiri mwatwen bwelan. Bi go sera ah rat tibwiri ba rat mas.